Украинадан “буғдой йўлаги” бўйича олиб чиқилган буғдойнинг камида 38 фоизи Евроиттифоқ мамлакатларига етказилган, деб ёзмоқда Испаниянинг País газетаси.

22 июлда Истанбулда Россия маҳсулотларини экспорт қилишга қарши қўйилган чекловни бекор қилиш ҳамда Украина буғдойини жаҳон бозорига чиқариш бўйича кўп томонлама битим имзоланган эди. Россия, Украина ва БМТ томонидан имзоланган ушбу келишув Украина буғдойи, озиқ-овқат маҳсулотлари ва ўғитларини Қора денгиздаги учта портдан, жумладан, Одесса портидан олиб чиқишни назарда тутади.

Нашрнинг БМТ маълумотларига таяниб ёзишича, Қора денгиз йўлаги орқали Украинадан 1 августдан 7 сентябргача 2,3 миллион тоннадан ортиқ маккажўхори дони, буғдой, арпа ва бошқа қишлоқ хўжалиги маҳсулотлари олиб чиқилган.

"Экспорт қилинган жами буғдойнинг 38 фоизи (тахминан 900 минг тонна) Европа Иттифоқи мамлакатлари портларига жўнатилган", – дейилади хабарда. Нашрнинг таъкидлашича, жўнатилаётган буғдойнинг охирги манзили ЕИ эканлигини текширишнинг имкони йўқ.

Нашрнинг берган маълумотларига кўра, Испания Украина буғдойининг энг йирик харидорларидан ҳисобланади. Ҳозиргача Қироллик портларига иккита кема етиб келган, яна иккитаси кутилмоқда.

Умуман, Испания жами 200 минг тонна атрофида маккажўхори, арпа ва кунгабоқар уруғи олиши керак. Бундан ташқари, хабарда келтирилишича, Украина экспортининг 20 фоизи Туркияга, 14 фоизи Хитой, Ҳиндистон ва Жанубий Кореяга етказилган. 27,5 фоиз маҳсулот Яқин Шарқ ва Африка мамлакатларига жўнатилган.