Еуропа нарығында өз беделіне ие «Accesa» компаниясы Өзбекстандағы қызметін кеңейтіп, жергілікті цифрлық экожүйеге белсенді араласуды жоспарлап отыр. Бұл бастама жастар үшін жаңа мүмкіндіктер ашып, заманауи жұмыс орындарын құруға жол ашады деп күтілуде.

Цифрлық технологиялар министрі Шерзод Шерматов «Accesa» және оның бас компаниясы — банк пен жоғары технологиялар саласында жетекші еуропалық цифрлық шешімдер провайдері өкілдерімен кездесу өткізді.

Келіссөздер барысында компанияның Өзбекстандағы қызметін кеңейту, ұлттық ІТ-экожүйеге инвестицияны арттыру, жастар үшін жаңа жұмыс орындарын ашу, кадрлар даярлау және біліктілікті жетілдіру бағдарламаларын іске қосу мәселелері талқыланды. Сондай-ақ, ІТ қызметтер экспортын ұлғайту, стартаптармен серіктестікті дамыту және инновациялық жобаларды қолдау мүмкіндіктері қарастырылды.

Министр Ш. Шерматов Өзбекстанның «Accesa» секілді жетекші халықаралық технологиялық компанияларды тартуға ұмтылысын атап өтіп, бұл қадам елдің экспорттық әлеуетін арттыруға, цифрлық экономиканың қарқынды дамуын қамтамасыз етуге және халықаралық аренадағы орнын нығайтуға қызмет ететінін жеткізді.

«Accesa» биыл маусым айында Өзбекстан нарығына ресми түрде кірген болатын. Қызметін жолға қойғаннан кейін, компания елде одан әрі кеңею жоспарын растады. Компания өкілдері Өзбекстанда ІТ саласы үшін жасалып жатқан қолайлы жағдайларды, әсіресе IT Park Uzbekistan ұсынған инфрақұрылым мен құқықтық жеңілдіктерді жоғары бағалады.

Жаңа бастамалар жүзеге асса, елде цифрлық саланың дамуына тың серпін беріп, аймақтық деңгейде технологиялық орталық қалыптастыруға жол ашпақ. «Accesa»-ның бұл қадамы халықаралық ІТ қауымдастығының Өзбекстанға деген сенімін арттырады. Сонымен бірге, жергілікті мамандардың жаһандық жобаларға қатысуына мүмкіндік туғызып, елді инновациялар орталығына айналдыруға ықпал етеді.