Еуропалық Одақтың халықаралық ынтымақтастық жөніндегі комиссары Йозеф Сикела 12-18 наурыз аралығында Орталық Азияның бес мемлекетіне сапар жасайды.

Бұл туралы ЕО-ның Өзбекстандағы өкілдігі хабарлады.

Сапар барысында ЕО мен Орталық Азия елдері арасындағы серіктестікті нығайту, жаңа жұмыс орындарын құру және тұрақты экономикалық өсуді ынталандыруға бағытталған Global Gateway стратегиясын кеңейту көзделген.

Комиссар Сикела Орталық Азияның ЕО үшін маңызды серіктес екенін атап өтіп, екіжақты қарым-қатынастарда зор әлеуеттің бар екенін жеткізді. Оның айтуынша, әлемдік мәселелер берік әріптестіктің маңыздылығын тағы да дәлелдеп отыр, ал ЕО аймақтағы жобаларды қолдауға және дамытуға дайын.

Сапар барысында транспорт, энергетика, цифрлық байланыс, жұмыс орындарын құру және табиғи ресурстарды тиімді пайдалану бойынша ынтымақтастықты дамыту мәселелері талқыланады. Осы тақырыптар аясында тараптар бірнеше келісімге қол қоймақ.

Комиссар Сикела Орталық Азиядағы сапарын Өзбекстанда аяқтайды. Ташкентте Үкімет және бизнес өкілдерімен кездесу өткізеді, Алмалық тау-кен металлургия комбинатына барады, сондай-ақ цифрлық инфрақұрылым бойынша келісімдерге қол қойылады.

Сапар аясында Еуропалық қаржы институттарының өкілдері, сондай-ақ жеке сектордың өкілдері қатысады. Сәуір айында Еуропалық Одақ – Орталық Азия саммиті, ал маусым айында Global Gateway форумы өтеді. Бұл сапар барысында талқыланған жобалардың іс жүзінде жүзеге асырылуы күтілуде.

Global Gateway – ЕО-ның цифрлық, энергетикалық және көлік салаларында экологиялық таза және қауіпсіз инфрақұрылымды дамытуға бағытталған стратегиясы. Сонымен қатар, бұл бастама денсаулық сақтау, білім және ғылыми зерттеулерді нығайтуға да ықпал етеді.