Еуропалық Одақ ЕО-ға мүше бес мемлекет үшін Украинадан ауылшаруашылық өнімдерінің жекелеген түрлерін әкелуге уақытша тыйым салуды 15 қыркүйекке дейін ұзартты.

Бұл туралы 5 маусымда Еуропалық комиссияның сайтында жарияланған хабарламада айтылған.

2 мамырда Брюссель Украинадан Болгария, Венгрия, Польша, Румыния және Словакияға бидай, жүгері және күнбағыс тұқымдарын әкелуге уақытша тыйым салды. ЕО 15 қыркүйекке дейін барлық шектеулерді алып тастауға ниетті екенін жариялаған.

Сонымен бірге, бұл шаралар «ЕО-ның Украинаны қолдау және оның дүниежүзілік азық-түлікпен қамтамасыз ету үшін өте маңызды астығын экспорттау мүмкіндігін сақтау жөніндегі берік міндеттемесіне сәйкес келеді, делінген Брюссель мәлімдемесінде.

Ұзақ уақыт бойы Қара теңіз порттары арқылы астық экспорттау мүмкіндігінен айырылған украиналық фермерлер Еуроодақтың шектеулеріне қатты сын айтып, олардың күшін жоюды сұрап отыр.