Американдық Meta компаниясының Facebook және Instagram әлеуметтік желілері Еуропадағы жұмысын тоқтатуы мүмкін.

АҚШ-тың Бағалы қағаздар және биржалар жөніндегі комиссиясы ұсынған есепте айтылуынша, мәселе Еуроодақ елдері деректерді тек еуропалық серверлерде сақтау мен өңдеуді қарастыратын жаңа заңның қабылдануымен байланысты. 

Meta компаниясының деректері қазіргі уақытта АҚШ пен Еуропада сақталады. Компания бұл тәсілді бизнес үшін әлеуметтік желілер тұрғысынан да, жарнама нарығы үшін де маңызды деп санайды.

ЕО жаңа ережелері Meta-да Facebook пен Instagram жұмысына қауіп төндіреді деп бағаланған. Трансатлантикалық деректерді беру жүйесі болмаса, компания еуропалық нарықтан мүлдем кетуі мүмкін.

Ғаламдық мәселелер жөніндегі вице-президент Ник Клегг бұл заңның интернет ландшафтына ғана емес, әлеуметтік медиа механизмдеріне сүйенетін барлық бизнес иелеріне де апатты болатынын айтқан.