Өзбекстан Орталық банкінің Басқармасы 2025 жылдың 27 тамызындағы 22/1-саны қаулысына сәйкес, «Еуразиялық банк» АҚ-тан банк қызметін жүзеге асыруға берілген лицензия қайтып алынған.

Орталық банктің ресми хабарлауынша, банктің жарғылық капиталы көлемі заңнамада белгіленген ең төменгі талаптарға сәйкес келмеген, сондай-ақ «Банктер және банк қызметі туралы» заңда көрсетілген басқа да міндеттемелер орындалмағаны үшін осындай шешім қабылданған. Нәтижесінде банкке қатысты мәжбүрлі тарату және тарату комиссиясын тағайындау туралы қаулы шыққан.

Атаулы банк жағдайға түсініктеме берген. Олардың айтуынша, Өзбекстандағы қызметтің тоқтатылуы – Қазақстандағы бизнесті дамытуға бағытталған бұған дейін қабылданған стратегиялық шешімнің қисынды жалғасы. Инвестицияларды тоқтату жөніндегі шешімді басқарма мен директорлар кеңесі реттеушінің ресми хабарламасынан әлдеқайда бұрын қабылдаған.

«Негізгі назарды Қазақстан нарығына аудару банкке жаңа жобаларды жүзеге асыруға және клиенттер мен серіктестер үшін ең әлеуетті сегменттердегі позицияларын нығайтуға мүмкіндік береді», – делінген Еуразиялық банктің ресми мәлімдемесінде.

Айта кетсек, Еуразиялық банк 1994 жылы Қазақстанда құрылған. Бас кеңсесі Алматы қаласында орналасқан. Банк 2024 жылдың қаңтар айында Өзбекстанда лицензия алған болатын. Алайда 2025 жылдың 1 тамызындағы жағдай бойынша оның депозит және несие портфелі нөлге тең болып, капиталы 104 млрд сумды құрады. Бұл талап етілетін ең төменгі мөлшерден 5 есе аз. Сонымен қатар, банк 2025 жылдың алғашқы жартыжылдығын 51,6 млрд сум шығынмен аяқтаған.