Ташкентте «Жібек жолындағы туризм» халықаралық туристік жәрмеңкесі өтіп жатыр.

Айтулы шара аясында өткен баспасөз мәслихатында Еуразия таулы курорттар альянсы өкілдері аталмыш халықаралық ұйымның бірінші жартыжылдықтағы қызметін қорытындылады.

Еуразия таулы курорттар альянсының Бас хатшысы Андрей Кукушкин жеткен жетістіктері туралы былай дейді:

— Биыл біз «Жібек жолындағы туризм» 29-шы Ташкент халықаралық туристік жәрмеңкесіне қатысып, Еуразия таулы курорттар альянсының жетістіктері бойынша презентация өткіздік. Мұндай іс-шаралар ұйымның қызметінің маңызды құрамдас бөлігі саналады.

Біздің басты мақсатымыз — туризм мен қонақжайлылық саласында жаңа бағыттарды ашу, қызмет көрсету сапасы мен бәсекеге қабілеттілігін арттыру, сондай-ақ туризм мәдениетін жаңа деңгейге көтеру. Бұл міндеттерді жүзеге асыру үшін біз Өзбекстандағы «Амирсой» тау-шаңғы курортымен ынтымақтастық байланыстарын орнаттық.

Жұмыстар жоспарға сәйкес жүргізілуде, ең маңыздысы — серіктестеріміз бен техникалық мамандар барлық идеяларымыздың шынайы өмірде жүзеге асуына сенім білдіруде. Олар жақын болашақта жүзеге асырылуы тиіс, алайда кейбір мәселелер шешімін күтіп тұр. Мәселен, әртүрлі елдердегі курорттарда қызметтерге ақы төлеу мүмкіндігін беретін халықаралық ски-пасс (электронды рұқсатнама) мәселесі халықаралық ақша аударымдарын реттеуді талап етеді. Қазіргі кезде бұл мәселе бірқатар шектеулер салдарынан күрделі, бірақ біз осы қиындықтарды шешу жолында белсенді жұмыс жасап келеміз және басқа елдердегі курорттармен ынтымақтастықты жалғастырудамыз. Қазан айында Тәжікстанның Сафед-Дара заманауи тау-шаңғы курортына барып, осы демалыс орнының басшылығымен келіссөздер жүргіздік. Қазіргі уақытта ынтымақтастық мәселелері бойынша жұмысты бастадық.

Одан басқа, Оңтүстік Кореядағы курорттың Альянсымызға қосылуы да маңызды оқиға болды. Бұл нағыз жетістік, өйткені Оңтүстік Корея жылы климатты ел, сондықтан тау-шаңғы маусымы небәрі екі айға созылады. Біз Альянсқа қосылу туралы меморандумға қол қойдық және жақында ресми келісім жасалады деп үміттенеміз. Бұл оқиға біздің халықаралық деңгейдегі беделімізді арттырып, басқа курорттардың назарын аударды.

Білім беру, біліктілікті арттыру және тәжірибе алмасу сияқты гуманитарлық бастамалардан бөлек, коммерциялық бағытты да белсенді дамытып келеміз. Альянс түрлі жабдықтар, материалдар және ресурстар жеткізушілері үшін сенімді серіктес бола алады, бұл барлық қатысушылар үшін жаңа мүмкіндіктер есігін ашады.

Н.Зиёдуллаева, ӨзА