Бугунги кунда Андижон вилоятида олти нафар Иккинчи жаҳон уруши қатнашчиси эл-юрт ардоғида ҳаёт кечирмоқда. Улардан бири Андижон шаҳрининг 1- кичик даҳасида яшовчи Александр Василевскийдир.
Ўзбекистон Республикаси Президентининг жорий йил 2 майдаги “Иккинчи жаҳон уруши қатнашчиларини рағбатлантириш тўғрисида” ги фармонига асосан Андижон вилояти ҳокими Шуҳратбек Абдураҳмонов бошчилигидаги бир гуруҳ вилоят фаоллари иккинчи жаҳон уруши қатнашчиси Александр Василевский хонадонида бўлди.
Александр Василевский асли Украинанинг Винница областида туғилиб ўсган. Фашистлар 1941 йилнинг август ойида у яшаётган қишлоқни босиб олиб, қишлоқ аҳолисини, ҳатто, болалар, аёллар ва кексаларни концлагерда сақлаган. Жумладан, Александрнинг онаси, икки синглиси ва укаси ҳам ана шу лагерда сақланган. Концлагердаги қийинчилик, азоб-уқубатлардан у ерда сақланаётганларнинг аксарияти ўлиб кетди. Уруш тугагач, Александр мактабни битиради. “Известия” газетасида Андижонда тиббиёт институти очилаётгани ҳақидаги хабарни ўқиб, тиббиёт институтига ўқишга кириш учун Андижонга келади.
Андижон давлат тиббиёт институтининг биринчи қалдирғочлари қаторида Александр институтни муваффақиятли тамомлайди. Сўнг 1- шаҳар шифохонаси урология бўлимига ишга киради. Умуман, Александр Василевскийнинг кейинги ҳаёти Ўзбекистон, хусусан, Андижон билан чамбарчас боғланиб кетди. Андижонда оила қурди, фарзандлар кўрди. Тиббиёт соҳасида узоқ йиллар самарали меҳнат қилди, ўз соҳасининг етук мутахассиси сифатида, қолаверса, ўзининг юксак инсоний фазилатлари билан эл-юрт орасида ҳурмат-эътибор топди.
– Андижон менинг учун энг қадрдон маскан, Ўзбекистон эса она Ватанимга айланган, – дейди Александр Василевский. – Инсон қадри улуғланаётган, шу юртда яшаётганлигимдан, шу юрт фуқароси эканлигимдан фахрланаман. – Айниқса, мен каби уруш қатнашчилари, фахрийларига Президентимизнинг эътибори, табригидан бошим кўкка етди.
[gallery-11773]
Йўқлов доирасида вилоят ҳокими Иккинчи жаҳон уруши қатнашчиси Александр Василевскийга Президентимизнинг табриги, пул мукофоти ва эсдалик совғаларини топширди.
Ф. Убайдуллаев,
З. Умрзоқов (сурат), ЎзА