Бугун И.М.Губкин номидаги Россия давлат нефть ва газ университетининг Тошкент шаҳридаги филиалида “UzTESPING” лойиҳаси доирасида “ESP around the Globe: Teaching and Research” мавзусида халқаро конференция ўз ишини бошлади.

Ўзбекистон Республикаси Вазирлар Маҳкамаси ҳузуридаги Хорижий тилларни ўрганишни оммалаштириш агентлиги, И.М.Губкин номидаги Россия давлат нефть ва газ университети Тошкент филиали ҳамда “Warwick University” билан ҳамкорликда ташкил этилган тадбирни ўтказишдан асосий мақсад талабаларга касбга йўналтирилган инглиз тили ўқитилишини такомиллаштириш ва ўқитувчилар малакасини ошириш, уларни шу соҳадаги замонавий ёндашувлар билан таништиришдан иборат.

Гибрид шаклда ўтказилаётган анжуманда юртимизнинг барча ҳудудларидаги олий таълим муассасаларидан юқори малакали ва халқаро тажрибага эга профессор-ўқитувчилар, тренерлар иштирок этди.

Хорижий ва маҳаллий педагоглар ўқув машғулоти бошланишидан олдин инглиз тилидаги китоблар кўргазмаси билан яқиндан танишишди.

Шунингдек, “Дунё бўйлаб касбга йўналтирилган инглиз тили: ўқув-методик ва тадқиқот масалалари” конференциясида сўзга чиққанлар мазкур учрашувнинг аҳамияти ҳамда замонавий билимлар ёрдамида ўқитувчилар малакасини оширишга алоҳида урғу бердилар.

– Форум хорижлик ва маҳаллий педагоглар ўртасида ўзаро тажриба алмашишга ёрдам беради, – дейди Хорижий тилларни ўрганишни оммалаштириш агентлиги мутахассиси Шаҳло Темирова. – Хорижий тилни билиш ҳозирги кунда ҳар бир педагог учун муҳим, чунки бу орқали ҳар бир тил ўқитувчиси ёки уни ўрганувчи ўзини янги билим билан бойитиб, кўникма ҳосил қилади.

Куннинг биринчи ярмида халқаро конференциянинг шўъба йиғилишлари ҳам бўлиб ўтди. Унда нофилологик ОТМларда “ESP” – махсус мақсадга йўналтирилган ингилиз тилини ўқитиш методикалари иштирокчилар томонидан қизғин муҳокама қилинди. Тадбирда айниқса, инглиз тилини ўргатишда Венеусуэла тажрибаси ва “ESPecially interesting” бўйича онлайн маъруза қатнашчиларда яхши таассурот қолдирди.

Халқаро конференция 21 май куни ниҳоясига етади.

Улуғбек Маҳмирзаев, ЎзА