Oʻzbekiston tarixida ilk bora tashkil etilayotgan ushbu musobaqada poytaxtimizning “Binokor”, “Xumo”, “Semurgʻ” hamda “Toshkent Siti” jamoalari ishtirok etishadi. Oʻyinlar poytaxtimizda yangi qurib bitkazilgan “Ice City” sport-koʻngilochar maskani muz maydonida oʻtkaziladi. Tarixiy birinchi chempionat oʻyinlari ikki oy davom etib, muxlislar jami 24 ta uchrashuvga guvoh boʻlishadi.

8 fevral kuni “Toshkent Siti” hamda “Binokor” jamoalari oʻrtasidagi oʻyin bilan birinchi Oʻzbekiston chempionatiga start beriladi. Shundan soʻng maydonga “Xumo” hamda “Semurgʻ” jamoalari chiqishadi. Chempionatning rasmiy ochilish marosimi esa soat 18:00da boshlanadi.

Muntazam chempionat oʻyinlari 17 mart kuni yakunlanadi. 20 martdan esa ikki raunddan iborat pley-off bahslari boshlanadi. Unda oʻyinlar uchta gʻalabagacha davom etadi.

Maʼlumot uchun, Oʻzbekiston xokkey federatsiyasi 2018 yil 28 martda Oʻzbekiston Respublikasi Adliya vazirligida davlat roʻyxatidan oʻtkazilgan. Federatsiyaning asosiy vazifasi – mamlakatimizda xokkey sport turini ommalashtirish va rivojlantirish, aholi orasida sogʻlom turmush tarzini keng targʻib qilish, xokkey boʻyicha Oʻzbekiston chempionati va kubogi, mamlakatimiz hududida oʻtkaziladigan xalqaro musobaqalarni tashkil etishdan iborat.