Eron tashqi ishlar vazirining maxsus yordamchisi Muhammad Rizo Rauf Shayboniy Suriyaga tashqi aralashuvning har qanday shaklini qoralab, ushbu arab davlati xalqi muloqot orqali siyosiy, etnik va madaniy birlikka erishishi zarurligini ta’kidladi. Bu haqda "Irna news" yozgan.

Yuqori martabali diplomat Suriya oldida turgan asosiy muammo mamlakat hududlari xorijiy kuchlar tomonidan bosib olinishi ekanini ta’kidladi. Uning ta’kidlashicha, "Suriyaning bir qismi Isroil tomonidan ishg‘ol qilingan, qolgan hududlari esa AQSH va Turkiya nazoratida".

Shayboniy Suriya yerining davomli bosib olinishi xavfsizlik, beqarorlik va etnik mojarolarga olib kelishi va mamlakatda terrorizm qayta tiklanishiga yo‘l ochishi mumkinligidan ogohlantirdi.

Asad hukumati qulagandan beri Isroil Suriya janubi bo‘ylab hujumni kuchaytirgan. Ayni jarayonda asosan harbiy ob’ektlar nishonga olinayotgan yuzlab havo hujumlari kuzatilmoqda.

Musulmon Ziyo, O‘zA