Eron oliy rahbari yaqindagi norozilik namoyishlarida minglab odamlar halok bo‘lganini tan oldi, bu esa rasmiy Tehron ilk bor qurbonlar ko‘lamini ochiq tan olayotganini anglatadi, deb xabar berdi DW.

Eron oliy rahbari Oyatulloh Ali Humonaiy shanba kuni so‘zlagan nutqida yaqinda bo‘lib o‘tgan noroziliklar paytida minglab insonlar o‘ldirilganini e’tirof etdi va ularning o‘limida AQSHni aybladi.  

“Isroil va AQSH bilan bog‘liq bo‘lgan shaxslar ulkan zarar yetkazdi va bir necha ming kishini o‘ldirdi”, - dedi Humonaiy.  

Uning so‘zlariga ko‘ra, namoyishchilar binolarni yoqib yuborgan, jamoat mulkini yo‘q qilgan va mamlakatda beqarorlik keltirib chiqargan. Bu ta’rif hukumatning namoyishlarni tinch fuqarolik harakati emas, balki isyon sifatida ko‘rayotganini ko‘rsatadi.

Bundan oldin AQSH prezidenti Donald Tramp eronlik namoyishchilarni “noroziliklarni davom etirishga” chaqirgan va Eron rahbariyatini ogohlantirib, agar xavfsizlik kuchlari ommaviy qirg‘inga o‘tsa, Vashington harbiy aralashuvni istisno qilmasligini bildirgan edi. Bu bayonotlar Eron tomonidan ichki ishlarga to‘g‘ridan-to‘g‘ri aralashuv sifatida qabul qilingan.

AQSHda joylashgan inson huquqlari faollari agentligi ma’lumotlariga ko‘ra, noroziliklarni shafqatsiz bosib tashlash natijasida kamida 3090 kishi halok bo‘lgan. Ayrim tashkilotlar esa qurbonlar soni bundan ham yuqori ekanini ta’kidlamoqda.  

Mamlakatda internetning deyarli to‘liq o‘chirib qo‘yilishi ishonchli ma’lumot olishni jiddiy qiyinlashtirmoqda, bu esa voqealar ko‘lamini yashirish ehtimolini kuchaytiradi.

Humonaiy nutqida Eron “ichki jinoyatchilarni ayamasligini” ta’kidlab, xalqaro jinoyatchilar ham jazodan qochib qutula olmasligini aytdi. Uning ijtimoiy tarmoqlardagi bayonotida esa “Amerikaning maqsadi -Eronni yo‘q qilish” ekani aytilgan, bu hukumat pozitsiyasining yanada keskinlashayotganini anglatadi.

Tramp hozircha Humonaiyning bu bayonotlariga javob bermadi.

<iframe width="650" height="420" src="https://www.youtube.com/embed/mOvEy1fcjm0" title="Erondagi namoyishlar: qancha kishi halok bo‘ldi?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Kenja Bekjonov, Iskandar Ismatov, O‘zA