Эрон олий раҳбари яқиндаги норозилик намойишларида минглаб одамлар ҳалок бўлганини тан олди, бу эса расмий Теҳрон илк бор қурбонлар кўламини очиқ тан олаётганини англатади, деб хабар берди DW.

Эрон олий раҳбари Оятуллоҳ Али Ҳумонаий шанба куни сўзлаган нутқида яқинда бўлиб ўтган норозиликлар пайтида минглаб инсонлар ўлдирилганини эътироф этди ва уларнинг ўлимида АҚШни айблади.  

“Исроил ва АҚШ билан боғлиқ бўлган шахслар улкан зарар етказди ва бир неча минг кишини ўлдирди”, - деди Ҳумонаий.  

Унинг сўзларига кўра, намойишчилар биноларни ёқиб юборган, жамоат мулкини йўқ қилган ва мамлакатда беқарорлик келтириб чиқарган. Бу таъриф ҳукуматнинг намойишларни тинч фуқаролик ҳаракати эмас, балки исён сифатида кўраётганини кўрсатади.

Бундан олдин АҚШ президенти Дональд Трамп эронлик намойишчиларни “норозиликларни давом этиришга” чақирган ва Эрон раҳбариятини огоҳлантириб, агар хавфсизлик кучлари оммавий қирғинга ўтса, Вашингтон ҳарбий аралашувни истисно қилмаслигини билдирган эди. Бу баёнотлар Эрон томонидан ички ишларга тўғридан-тўғри аралашув сифатида қабул қилинган.

АҚШда жойлашган инсон ҳуқуқлари фаоллари агентлиги маълумотларига кўра, норозиликларни шафқатсиз босиб ташлаш натижасида камида 3090 киши ҳалок бўлган. Айрим ташкилотлар эса қурбонлар сони бундан ҳам юқори эканини таъкидламоқда.  

Мамлакатда интернетнинг деярли тўлиқ ўчириб қўйилиши ишончли маълумот олишни жиддий қийинлаштирмоқда, бу эса воқеалар кўламини яшириш эҳтимолини кучайтиради.

Ҳумонаий нутқида Эрон “ички жиноятчиларни аямаслигини” таъкидлаб, халқаро жиноятчилар ҳам жазодан қочиб қутула олмаслигини айтди. Унинг ижтимоий тармоқлардаги баёнотида эса “Американинг мақсади -Эронни йўқ қилиш” экани айтилган, бу ҳукумат позициясининг янада кескинлашаётганини англатади.

Трамп ҳозирча Ҳумонаийнинг бу баёнотларига жавоб бермади.

<iframe width="650" height="420" src="https://www.youtube.com/embed/mOvEy1fcjm0" title="Erondagi namoyishlar: qancha kishi halok bo‘ldi?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Искандар Исматов, ЎзА