Eronning Tasnim axborot agentligi ma’lum qilishicha, mamlakatning janubi-g‘arbida Xuzestan viloyatidagi Abadan shahrida o‘n qavatli bino qulab tushgan, qurbonlar borligi aytilmoqda.

"Amiri ko‘chasidagi binoning bir necha qismi qulagan. Binodagilar to‘lig‘icha evakutsiya qilingan. Bino yonida turgan transport vositalari zarar ko‘rdi", – deyiladi agentlik tarqatgan xabarda.

Hozircha falokat natijasida  to‘rt kishi jabr ko‘rgan va barchasi mahalliy kasalxonaga yotkazilgan. Bir kishi halok bo‘lgan, deyiladi xabarda.
Keyinroq Fars axborot agentligi Eron Yarimoy jamiyati bergan ma’lumotiga tayanib ma’lum qilishicha, qulab tushgan 10 qavatli bino vayronalari ostida kamida 80  kishi qolmoqda. 

So‘nggi ma’lumotlarga ko‘ra, falokat oqibatida to‘rt kishi qurbon bo‘lgan, 25 kishi jabr ko‘rgan.