Bugun dunyo sahnasida bir qator muhim voqealar sodir bo‘ldi.

<iframe width="650" height="420" src="https://www.youtube.com/embed/izcY6uS3GFI" title="Eronda namoyishchilarga qarshi qonli bosim kuchaydi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

AQSH Eron bilan savdo qilayotgan mamlakatlarga 25% boj joriy qiladi

AQSH prezidenti Donald Tramp Eron bilan iqtisodiy aloqada bo‘lgan barcha mamlakatlarga 25 foizlik boj belgilanishini e’lon qildi. Bojlar tafsiloti hozircha ochiqlanmagan. Shu bilan birga, avvalroq Tramp Erondagi ommaviy noroziliklar kuch bilan bostirilsa, harbiy zarba berish bilan tahdid qilgan edi.

Somali-BAA xavfsizlik bitimi bekor qilindi

Somali hukumati Birlashgan Arab Amirliklari bilan tuzilgan xavfsizlik va mudofaa bitimlarini bekor qildi. Berbera, Bosaso va Kismayo portlari bo‘yicha barcha kelishuvlar tugatildi, mamlakat suvereniteti va hududiy yaxlitligini himoya qilishga qaratilgan qonun loyihalari ma’qullandi.

Eronda namoyishlar qon bilan bostirildi

Xavfsizlik kuchlari tinch namoyishchilarga qarshi o‘q ochdi. Eng yirik chiqishlar Tehron va boshqa shaharlarda bo‘lib o‘tdi. So‘nggi Eron shohi o‘g‘li Rizo Pahlaviyning chaqiriqlaridan keyin ko‘chalarga chiqqanlar soni keskin oshgan. Hukumat AQSH va Isroilni ayblamoqda.

G‘azo sektorida ochlik og‘irlashmoqda

BMT ma’lumotlariga ko‘ra, 2025 yilda qariyb 95 ming bola ochlikdan aziyat chekdi. O‘tgan oy 76 mingdan ortiq bola tekshirilgan va ularning 4 900 nafarida o‘tkir ovqatlanish yetishmasligi, 820 nafar bolada esa og‘ir holat aniqlangan.

AQSH Federal Rezerv raisi Jerome Powellga xalqaro qo‘llab-quvvatlash

Dunyo markaziy banklari Powellning mustaqil qaror qabul qilishini va moliya barqarorligini himoya qilishini yuqori baholadi. Shu bilan birga, AQSHda  Powellga nisbatan tergov fonida bu qo‘llab-quvvatlash yanada muhim ahamiyat kasb etadi.

Filippinning Sibu shahrida axlatxona halokati

Binaliv axlatxonasi hududida 11 kishi vafot etdi, 12 kishi yaralandi, 20 dan ortiq ishchi hanuzgacha izlanmoqda. Hodisaning asosiy sabablari: og‘ir axlat, noto‘g‘ri loyihalash va muhandislik xatolari.

Fransiyada Marine Le Penning apellyatsiya sud jarayoni boshlandi

Ekstremistik o‘ng qanot siyosatchisi Marine Le Pen 5 yil davomida saylovlarda qatnashish taqiqi berilgan hukmga apellyatsiya sudiga murojaat qildi. Sud jarayoni 13 yanvar kuni Parijda boshlandi.

Nozimbek Mardonov, Oybek Davronov (video) O‘zA