Эрон ахборот вазирлигининг маълум қилишича, Керман шаҳридаги Ислом инқилоби қўриқчилари қўмондони генерал Қосим Сулаймоний дафн қилинган  қабристонда уюштирилган теракт ижрочиларидан бирининг шахси аниқланган. «РИА Новости»нинг хабар беришича, ўзини қурбон қилган террорчиларнинг бири Тожикистон фуқароси экани маълум қилинган.

Жума куни эрталаб Эрон ички ишлар вазирининг хавфсизлик ва ҳуқуқ-тартибот масалалари бўйича ўринбосари Сайид Мажид Мираҳмадий Кермандаги портлашларни икки худкуш террорчи амалга оширганини айтганди. 

“Икки худкуш террорчининг бири Тожикистон фуқаролигига эга, бироқ унинг шахси ҳали тўлалигича аниқлангани йўқ”, - дейилади мазкур идора сайтида тарқатилган хабарда. 

Эрон ички ишлар вазири Аҳмад Ваҳидийнинг баёнот беришича, портлашга алоқаси бўлган қатор шахслар қўлга олинган. 

“IRNA” ахборот агентлигининг маълумотига кўра, ҳозиргача ҳалок бўлганлар сони 89 кишини ташкил этган, уларнинг 12 нафари 15 ёшгача бўлган болалардир, жами 284 киши жароҳат олган.