Эрон ҳукумати Исроил билан июнь ойида юз берган 12 кунлик кескин можаро чоғида 21 000 га яқин шахс қўлга олинганини эълон қилди. Расмий маълумотга кўра, 261 киши жосусликда гумон қилинган, 172 фуқаро ноқонуний суратга олишда айбланган, 2 774 мигрант ноқонуний равишда мамлакатда бўлган.

13 июнда Исроил Эрон ҳудудига ҳаво зарбалари уюштиргач, мамлакат бўйлаб 1000 дан зиёд назорат манзиллари ишга туширилди. Полиция вакили Саид Мунтазирулмаҳдий давлат телеканалига берган интервьюсида ушбу тадбирлар фуқароларнинг фаол хабардорлиги ва маълумот бериши асосида амалга оширилганини таъкидлади.

Текширув чоғида гумондорларнинг телефони кўздан кечирилган ва 30 та махсус хавфсизлик ҳолати аниқланган.

БМТ Қочқинлар агентлиги эса можаро пайти Эрон Афғонистон фуқароларини депортация қилишни кескин оширгани, энг юқори кўрсаткич 26 июнда қайд этилгани, бир кунда 36 100 нафар афғон мамлакатни тарк этганини маълум қилди.

Бу рақам Эрон суд тизими раҳбари Ғуломҳусайн Муҳсиний ўтган ой айтган 2 000 кишилик кўрсаткичдан анча фарқ қилади. Унинг сўзларига кўра, ҳибсга олинганларнинг кўпи айбсиз, деб топилиб, қўйиб юборилган.

Мусулмон Зиё, ЎзА