“Press TV” телеканали Исроил билан ўт очишни тўхтатиш келишуви Эрон томонидан берилган бир неча ракета зарбасидан кейин кучга киргани ҳақида хабар берган. Аввалроқ Исроил мудофаа кучлари Эрондан олтита ракета учирилгани ҳақида ёзганди.

АҚШ Президенти Дональд Трамп “Axios” порталига берган интервьюсида сулҳ тузилиши Исроил ва бутун дунё учун улкан воқеа эканини айтди:

– Бу урушнинг тугаши – Исроил ва дунё учун ажойиб.

24 июнга ўтар кечаси Трамп бу битим 12 кунлик урушнинг расмий якунига айланиши кераклигини маълум қилди.

Американинг “New York Times” газетаси номаълум Исроил ҳарбий ходими мазкур баёнотга изоҳ беришдан бош тортганини таъкидлаган.

Эрон ташқи ишлар вазири Аббос Арағчий ҳозирча ўт

очишни тўхтатиш ёки ҳарбий амалиёт бўйича келишув мавжуд эмас, бироқ Исроил маҳаллий вақт билан эрталаб соат 4:00 дан кечиктирмай тажовузини тўхтатса, Теҳрон ҳам зарба бермайди, деган.

Оқ уй раҳбари сешанба куни ижтимоий тармоқдаги саҳифасида Эрон ва Исроил тинчлик сўраганини билдирди ва агар ўзаро ҳужум тўхтамаса, иккала давлат ҳам нималарнидир йўқотиши мумкинлигидан огоҳлантирди:

– Исроил ва Эрон деярли бир вақтда менинг олдимга

келиб, “Тинчлик!” дейишди. Тинчлик ва Яқин Шарқ ҳақиқий ғолиблар эканини билардим, икки халқ ҳам келажаги учун кўп нарсага эга бўлади. Мабодо, улар адолат ва ҳақиқат йўлидан адашса, кўп нарса йўқотади.

Трамп фикрича, Эрон биринчи бўлиб ўт очишни тўхтатади, Исроил эса ушбу тартибга 12 соатдан кейин амал қила бошлайди.

Саидмурод Раҳимов, ЎзА