Яқин саккиз йил ичида Эронда кунига газ қазиб олиш 1,5 миллиард кубометрга етади. Бу ҳақда Нефть вазири ўринбосари Хушанг Фалахатиянга таяниб “ИРНА” агентлиги хабар берди.

“Бу мақсадга эришиш учун соҳага 80 миллиард доллар сармоя киритишимиз керак”. Унинг сўзларига кўра, Эрон нефть ва газга бой мамлакатлардан бири бўлиб, ерости газ ва нефть ресурслари қуввати бўйича дунёда биринчи ўринда туради.

“Нефть-газ ва нефть-кимё соҳаларининг саъй-ҳаракатлари билан кунига тўрт миллион юз минг баррель нефть қазиб олиш имкониятига эгамиз. Заводлар кунига 2 миллион 200 минг баррель нефтни қайта ишлаш қувватига эга”, деди вазир ўринбосари.

Фалахатияннинг таъкидлашича, мамлакатда кунлик газ ишлаб чиқариш ҳажми 850 миллион кубометрни ташкил қилади.

ЎзА