Теҳрон Вашингтон билан давом этаётган музокараларда нафақат ядро масаласини, балки миллиардлаб долларлик иқтисодий ҳамкорликни ҳам кун тартибига қўймоқда. Эрон томони нефть-газ конлари, қўшма кончилик лойиҳалари ва ҳатто самолёт харидлари бўйича келишувлар муҳокама қилинаётганини маълум қилди. Бу ҳақда Reuters хабар берди.

Мамлакат ташқи ишлар вазирлигининг иқтисодий дипломатия бўйича раҳбари ўринбосари Ҳамид Ғанбарийга кўра, битим барқарор бўлиши учун АҚШ ҳам тез ва юқори иқтисодий фойда кўриши керак. Унинг таъкидлашича, 2015 йилги келишув Қўшма Штатлар манфаатларини етарлича қамраб олмаган ва айнан шу омил битимнинг узоқ “яшамаслигига” сабаб бўлган.

Икки томон ўртасидаги музокаралар ўн йиллик кескинликни юмшатиш ва эҳтимолий ҳарбий тўқнашувнинг олдини олишга қаратилган. Шу билан бирга, АҚШ музокаралар муваффақиятсиз тугаса, ҳарбий сценарий эҳтимолини ҳам инкор этмаяпти. Давлат котиби Марко Рубио президент Дональд Трамп дипломатик йўлни афзал кўришини билдирган бўлса-да, якун кафолатланмаганини тан олди.

Женевада бўлиб ўтиши кутилаётган навбатдаги учрашув арафасида Ислом Республикаси айрим масалаларда муросага тайёр эканини қайд этган. Шунга қарамай, Теҳрон ички уран бойитишни тўлиқ тўхтатиш талабини қатъиян рад этмоқда. Музокараларнинг муваффақияти минтақа хавфсизлиги ва Эрон иқтисодиётининг келажаги учун ҳал қилувчи омил бўлиши мумкин.

Аввалроқ, агар Трамп буйруқ берса, вазият ўта жиддий можарога айланиб кетиши мумкинлиги ҳақида ёзган эдик. Унда Пентагон аллақачон Яқин Шарққа қўшимча куч, жумладан авиаташувчи кема, қирувчи самолёт, бошқариладиган ракета эсминеци каби фаол қурилмалар юбораётгани, бу эса Эрон билан дипломатик муносабатдаги ўзгариш кучайиб бораётгани таъкидланган эди.

Мусулмон Зиё, ЎзА