Эрон парламенти спикери Муҳаммад Багир Ғолибоф АҚШ президентининг таҳдидларига қарши баёнот берди. Унинг сўзларига кўра, Эронга қарши ҳар қандай ҳужум жавобсиз қолмайди.

Икки ҳафтадан бери Эронни умуммиллий норозилик намойишлари қамраб олган. Инсон ҳуқуқлари ташкилотлари маълумотларига кўра, тўқнашувлар оқибатида камида 538 киши ҳалок бўлган. Аммо, ҳақиқий қурбонлар сони бундан ҳам кўп бўлиши мумкинлиги айтилмоқда. Бундан ташқари 10 мингдан ортиқ киши ҳибсга олинган. Эрон ҳукумати эса ҳалок бўлганлар сони бўйича расмий маълумот бермаган, дея хабар берди Evronews.

Интернет ва мобил алоқанинг ўчирилиши сабабли намойишларни хориждан кузатиш қийинлашган. Чет элдаги эронликлар ахборот блокадаси қонли репрессияларга олиб келиши мумкинлигидан хавотир билдирмоқда. АҚШ президенти Дональд Трамп ижтимоий тармоқларда намойишчиларни қўллаб-қувватлаб, “Эрон, эҳтимол, ҳеч қачон бу қадар озодликка яқин бўлмаган. АҚШ ёрдам беришга тайёр!” деб ёзди.  

Шанба куни New York Times ва Wall Street Journal газеталари номаълум америкалик манбаларга таяниб, Трампга Эронга зарба бериш вариантлари таклиф этилгани, бироқ якуний қарор қабул қилинмагани ҳақида хабар берди. Уруш бошлаш ҳақидаги ҳар қандай қарор 86 ёшли Эрон олий раҳбари Оятуллоҳ Али Ҳумонаий томонидан қабул қилинади. Таҳлилчиларнинг  фикрича, айниқса Исроил билан бўлган 12 кунлик урушда Эроннинг ҳаво мудофаа тизимлари йўқ қилинган эди, шу сабаб Теҳроннинг зарба бериш нияти қай даражада жиддий экани ҳануз ноаниқ.

<iframe width="640" height="420" src="https://www.youtube.com/embed/mf9KFRaxANg" title="Eron: AQSH va Isroil aralashsa, javob qattiq bo‘ladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов (видео), ЎзА