Ўзбекистонда олиб борилаётган ислоҳотлар, хусусан, ижтимоий адолатни мустаҳкамлаш ва муносиб меҳнатни тарғиб қилиш борасидаги ҳаракатлар халқаро ташкилотлар томонидан юқори баҳоланмоқда. Конституция даражасида оила, болалар ва ижтимоий ҳимояни муҳофаза қилиш, шунингдек, сўз эркинлигини таъминлаш асосий йўналишлар сифатида белгиланган.

Алишер Навоий номидаги Ўзбекистон Миллий кутубхонасида сиёсатшунос Камолиддин Раббимовнинг ўзбек, рус ва инглиз тилларидаги "Эркин миллат пойдевори" китоби тақдимот маросими бўлиб ўтди. Мазкур тадбирда таниқли олимлар, жамоат арбоблари ҳамда соҳа мутахассислари иштирок этишди.  

“Эркин миллат пойдевори” - Ўзбекистон жамияти ва давлатчилиги қандай шаклланганини тушунишга ёрдам берувчи муҳим асар. Китоб муаллифнинг кўп йиллик изланишларига таянган ҳолда ёзилган бўлиб, унда сиёсий фикрлаш, бошқарув маданияти, жамият зеҳнияти ва қадриятлар масалалари ёритилган.

Асарда давлат ва жамият муносабатлари, сиёсий маданият, эркинлик, ижтимоий ишонч ҳамда яқин ўтмиш ва бугунги ўзгаришлар ҳақида сўз юритилади. Китоб сиёсатшунослар, журналистлар, талабалар ва мамлакат тараққиётига қизиққан барча китобхонлар учун мўлжалланган бўлиб, кутутбхона жавонларидан севимли адабиёт сифатида жой олишига ишонамиз.

<iframe width="640" height="420" src="https://www.youtube.com/embed/RlRlsfyEEj4" title="Erkin millat poydevori" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳайё Турдалиева, Нишонбой Абдувоитов (видео), ЎзА