Туркия Президенти Режеп Таййип Эрдоған Нью-Йоркда “Tesla” компанияси соҳиби Илон Маск билан учрашди. Бу ҳақда давлат раҳбари матбуот хизмати ижтимоий тармоқ орқали маълум қилди.

“Эрдоған Нью-Йоркдаги Турк уйида “Tesla” ва “SpaceX” компаниялари асосчиси Илон Маскни қабул этди”, дейилади баёнотда.

Суҳбат чоғида давлат етакчиси тадбиркорга “Tesla” электромобил ишлаб чиқарувчи заводининг еттинчисини Туркияда очиш таклифини берди.
“SpaceX” билан истиқболдаги тараққиётни қайд этаркан, Эрдоған Маскни сентябрь ойида Измир шаҳрида ўтадиган технология кўргазмасида иштирок этишга даъват қилди. Президент миллиардерга мамлакатининг рақамлаштириш концепцияси ва сунъий интеллект соҳасидаги миллий стратегияси тўғрисида гапириб берди.

Бу Туркия етакчисининг тадбиркор билан биринчи учрашуви эмас. Улар ўтган йил Қатарда, футбол бўйича жаҳон чемпионати финал ўйини вақтида ҳам кўришган.