Туркия Президенти Режеп Таййип Эрдоған Стокгольмдаги шов-шувли ҳодисадан сўнг Швеция Анқарадан НАТОга кириши учун берган мурожаатини қўллаб-қувватлашини кутмаслигини айтди. Бу ҳақда у Вазирлар Маҳкамаси йиғилишидан сўнг маълум қилди.

“Швециядаги нопок ҳаракатлар, ҳатто дипломатик ваколатхонамиз яқинидаги бу ҳодиса мусулмонларга, умуман, барча инсонларга, барча ҳуқуқ ва эркинликларга нисбатан ҳақорат сифатида қабул қилинади. Сиз террорчиларни қўллаб-қувватлашни давом этиш билан бирга НАТОга аъзо бўлиш учун биздан мадад кутмоқдасиз. Бу энди бўлмайди. Швеция энди биздан бундай ёрдам кутмаслиги керак”. Эрдоғаннинг мазкур иқтибосини “TRT” телеканали келтирди.

Президент Стокгольмдан террор ташкилотларига қарши курашда Туркия олдидаги мажбуриятларини тўлиқ бажарилишини кутишини таъкидлади.

“Агар Швеция ҳукумати ҳуқуқ ва эркинликларни шунчалик ҳурмат қилса, улар биринчи навбатда Туркия Республикаси ва барча мусулмонларнинг диний туйғуларини ҳурмат қилмоғи керак. Агар бу ҳурматни кўрсатмасангиз, кечирасиз, биздан марҳамат кутманг”, деди Эрдоған.

ЎзА