Президент Режеп Таййип Эрдоған кеча Анқарада НАТО Бош котиби Марк Рютте билан музокара чоғида Туркия томонидан Россия – Украина можаросига барҳам бериш бўйича саъй-ҳаракат кучайтирилганини билдирди.

Шу билан бирга у Шимолий Атлантика альянси зиддиятнинг бир қисми бўлиб қолмаслиги зарурлигига эътибор қаратди. Бу маълумотни Туркия раҳбари идораси тарқатган.

Эрдоған Рюттени Президент саройида қабул қилди. Учрашувда Туркия ва НАТО ўртасидаги муносабат, Украина ва Россия уруши атрофидаги вазият ривожи, минтақавий ва глобал муаммолар муҳокама қилинди. Шунингдек, Эрдоған Туркия НАТОга алоҳида аҳамият беришини тасдиқлаган ҳолда, Анқара яна Косоводаги Альянс кучларига қўмондонлик қилишини таъкидлади.

– Президент Эрдоған Туркия Украина – Россия урушини доимий ва адолатли тинчлик билан тугатиш йўлидаги саъй-ҳаракатни кучайтиргани, Президентлар Владимир Путин ва Владимир Зеленский билан музокаралар ўтказгани, кенг қамровли ўт очишни тўхтатиш келишувини қатъий қўллаб-қувватлаши ҳамда НАТО бу урушнинг бир қисмига айланмаслиги ва тинчлик йўлида олиб борилаётган саъй-ҳаракат беҳуда кетишига йўл қўйиб бўлмаслигини таъкидлади, – дейилган идора ахборотида.

Ўз навбатида Рютте Туркиядаги музокарадан сўнг Россия – Украина можаросида “тинчлик сари олға силжиш учун ҳақиқий имконият эшиги очилиши”ни таъкидлади:

– Президент Режеп Таййип Эрдоған билан келаси ой Альянсни мустаҳкамлаш масаласи муҳокама қилиниши кутилаётган саммитга тайёргарлик доирасида ажойиб учрашув ўтказдик, деб ёзди НАТО етакчиси ижтимоий тармоқ орқали. – Туркия содиқ ва кучли иттифоқчи. Биз тинчликка эришиш учун ҳақиқий имконият дарчаси очилган Россия – Украина зиддияти мавзусини ҳам муҳокама қилдик.

С.Раҳимов, ЎзА