Туркия ва Миср президентлари Режеп Таййип Эрдоған ва Фаттах ас-Сиси якшанба куни илк бор учрашув ўтказди, деб хабар тарқатди Anadolu агентлиги.

Уларнинг учрашуви Қатарда футбол бўйича жаҳон чемпионати очилишига бағишланган маросим жараёнида бўлиб ўтди. Хабарда айтилишича, учрашув жуда тез ўтган. Икки мамлакат етакчилари саломлашган ва бир-бирига қўл беришган.

Туркия билан Миср муносабатлари 2013 йилда ҳарбийлар томонидан Муҳаммад Мурси президентликдан четлаштирилгандан кейин бузилган эди. Ушбу воқеадан кейин мамлакатлар ўзларининг элчиларини чақириб олди. Ўшанда Эрдоған ас-Сисини бир неча бор "тиран", деб атаган эди. Анқара 2013 йил июль ойи воқеаларини “ҳарбий тўнтариш” сифатида баҳолаб келади.

2021 йил март ойида Туркия Ташқи ишлар вазири Мавлуд Човушўғли Анқара ва Қоҳира ўртасида дипломатик даражада алоқалар йўлга қўйилётгани ҳақида маълум қилганди. Шунингдек, у муносабатларни тўлиқ йўлга қўйиш учун вақт кераклигини ҳам таъкидлаганди.