Польшаның Лодзь қаласында өткен ЕҚЫҰ Сыртқы істер министрлері кеңесінің 29-шы отырысы аясында Өзбекстанның Сыртқы істер министрі Владимир Норов Еуропадағы қауіпсіздік және ынтымақтастық ұйымы Парламенттік Ассамблеясының (ЕҚЫҰ ПА) төрағасы Маргарита Седерфельтпен кездесті.

Сыртқы істер министрлігінің хабарлауынша, Өзбекстан сыртқы саясат кеңсесінің басшысы Маргарита Седерфельтті 2022 жылдың шілде айында Ассамблея төрағасы лауазымына қайта сайлануымен құттықтады.

Өзбекстан Олий Мажлисінің палаталары мен ЕҚЫҰ ПА арасындағы өзара ынтымақтастықты кеңейту мәселелері талқыланды.

«Владимир Норов ЕҚЫҰ Парламенттік Ассамблеясының төрағасын Жаңа Өзбекстанда жүзеге асырылып жатқан, қоғамның барлық дерлік салаларын қамтитын жедел және ауқымды демократиялық реформалар туралы хабардар етті.

«Жаңа Өзбекстанды» дамыту стратегиясының басты мақсаттарының бірі – Өзбекстанда жүзеге асырылып жатқан реформаларды дәйекті түрде жалғастыруда Олий Мажлис палаталары мен саяси партиялардың рөлін одан әрі арттыру болып табылады», делінген хабарламада.

Ведомство дерегінше, 2023 жылы Өзбекстанда ЕҚЫҰ ПА күзгі сессиясын өткізуге байланысты ұйымдастыру мәселелері бойынша пікір алмасылып, басқа да халықаралық және аймақтық мәселелер талқыланған.