Еуропаның қауіпсіздік және ынтымақтастық ұйымы Төрағасының гендер мәселелері жөніндегі арнайы өкілі Саара-София Сирен Өзбекстанда қолға алынып, дәйекті түрде жүргізіліп жатқан гендерлік саясатты жоғары бағалады.

Сенаттың ақпарат қызметінің хабарлауынша, аталған өкіл Өзбекстан Республикасының Олий Мажлис Сенатының Төрағасы Танзила Нарбаевамен конструктивті кездесу өткізді.

Келіссөз барысында республикада гендерлік теңдікті қамтамасыз ету, әйелдердің құқықтары мен мүдделерін қорғау, сондай-ақ зорлық-зомбылықтың алдын алу бағытындағы жүйелі реформалар талқыланды. Заңнама мен институционал негіздерді жетілдіру, әйелдердің әлеуметтік-саяси белсенділігін арттыру, олардың қауіпсіздігін қамтамасыз етуге арналған қорғау және реабилитация қызметтерін дамыту сияқты бастамалар өз нәтижесін бере бастағаны атап өтілді.

Хабарламада Саара-София Сиреннің Өзбекстан жүргізіп жатқан гендерлік саясатқа жоғары баға бергені, гендерлік зорлық-зомбылыққа қарсы іс-қимыл мен әйелдер құқықтарын нығайту бағытындағы бастамалардың маңыздылығын айрықша атап өткені көрсетілген.

Кездесуде өңірлерде жұмыс істеп тұрған әйелдерді реабилитациялау және бейімдеу орталықтарының рөліне де назар аударылды. Азаматтық қоғам институттары мен үкіметтік емес ұйымдардың белсенді қатысуы, сондай-ақ ерлер мен ұл балаларды гендерлік теңдік мәдениетін қалыптастыру үдерістеріне кеңінен тартудың өзектілігі айтылды.

Кездесу соңында Өзбекстан мен ЕҚЫҰ арасындағы өзара ынтымақтастықты күшейту, соның ішінде Орталық Азия елдерінің жетекші әйелдері диалогы аясындағы бірлескен іс-қимылды тереңдету, екіжақты платформалар арқылы тәжірибе алмасу және практикалық әрекеттерді үйлестіру жөнінде келісімге қол жеткізілді. Осы келісім алдағы жобаларды тиімді іске асыруға жаңа серпін береді.