Еуропа қайта құру және даму банкі Өзбекстанның энергетикалық жүйесін дамытуға 47,1 млн доллар бөлді.

Инвестициялар және сыртқы сауда министрлігінде Еуропалық қайта құру және даму банкінің бірінші вице-президенті Юрген Ригтеринк бастаған делегациямен кездесу өтті. Онда «Өзбекстанның ұлттық электр желілері» (УзМЕТ) АҚ жүйесiне кiретiн жаңа электр беру желiсiн салу жобасы бойынша несие және жобалық келiсiмге қол қойылды. 

Министрлік дерегінше, іс-шарада соңғы жылдары Өзбекстан бірқатар халықаралық қаржы институттарымен инвестициялық ынтымақтастықты айтарлықтай кеңейткені атап өтілген. Олардың ішінде Еуропалық қайта құру және даму банкі жетекші орындар қатарында. Бүгінгі таңда ЕҚҚДБ Өзбекстандағы 113 жобаға 3,6 миллиард еуродан астам инвестиция салған. 

Банк «Өзбекстан ұлттық электр желілері» АҚ Хорезм және Бұхара облыстарындағы жаңа электр беру желісін салу жобасын қаржыландыру үшін 47,1 миллион доллар қаржылай көмек көрсетеді. Бұл республиканың ұлттық электр желісінің қуаттылығы мен сенімділігін арттыруға қызмет етеді. Жаңа желі салынып жатқан жалпы қуаты 1 ГВт екі жел электр станциясын ұлттық желіге қосады. Жобаға өтпелі экономикасы бар елдер қоры мен Акционерлердің арнайы қоры қолдау көрсетуде.

Желінің кеңеюі жаңартылатын энергия көздері Өзбекстанның энергетикалық жүйесіне одан әрі интеграциялануына ықпал етеді. Бұл өз кезегінде қолданыстағы электр жеткізу желілеріндегі жүктемені теңестіріп, елдің солтүстігі мен оңтүстік-батысындағы электр желілеріндегі үзілістер мәселесін шешуге мүмкіндік береді. Жоба электрмен жабдықтау жүйесінің қуаттылығын арттырып, желідегі ысыраптарды азайтады. Бұл жоба әсіресе Өзбекстанның дамып келе жатқан өнеркәсібі мен тұрғындарының өсіп келе жатқан қажеттіліктері үшін маңызды болып, олар тұрақты энергиямен қамтамасыз етуді қажет етеді.

«Өзбекстан Орталық Азиядағы халқы ең көп ел ғана емес, сонымен қатар тұрақты инфрақұрылымдық шешімдерді қажет ететін аймақтағы экономикасы ең жылдам дамып келе жатқан ел. Біздің банк осындай жобаларды қаржыландыру арқылы бұл өсімді қолдауға дайын», деген Еуропалық қайта құру және даму банкінің бірінші вице-президенті Юрген Ригтеринк.