Шу кунларда Япония пойтахти Токио шаҳрида енгил атлетика бўйича жаҳон чемпионати мусобақалари бўлиб ўтмоқда.

200га яқин давлатнинг 2200 нафардан ортиқ енгил атлетикачилари иштирок этаётган жаҳон чемпионатининг марафон мусобақаларида Танзания вакили Альфонс Феликс Симбу 2:09:48 вақт кўрсаткичи билан ғолибликка эришган бўлса, кейинги поғоналарни германиялик Аманал Петрос ва Италия терма жамоаси аъзоси Илиас Ауани эгаллади.

Ҳамюртимиз "Париж-2024" Олимпиадаси иштирокчиси Шоҳрух Давлатов  2:18:04 натижа билан марафон марра чизиғини 37-бўлиб кесиб ўтди. Бу, енгил атлетикачимизнинг жорий мавсумдаги энг яхши кўрсаткичи сифатида эътироф этилди

Жаҳон чемпионатида Давлатовдан ташқари Ўзбекистон терма жамоасининг 2 нафар аъзоси - Анвар Анваров узунликка сакрашда, Шарифа Давронова уч ҳатлаб сакраш дастурида ўз омадини синаб кўришга ҳозирланмоқда.

Бугун, 15 сентябрь куни жаҳон чемпионати дастурига кўра, 9 та йўналишда мусобақалар ташкил этилади. Ҳамюртимиз Анвар Анваров узунликка сакрашнинг саралаш баҳсларида “Б” гуруҳида 19 нафар енгил атлетикачи билан баҳсларга киришади.

Эслатиб ўтамиз, 21 сентябрга қадар давом этадиган жаҳон биринчилиги баҳсларида спортчилар 49 та йўналишдаги мусобақаларда медалларни қўлга киритиш учун кураш олиб боради.

Т.Рўзиев,

ЎзА