Хабар берганимиздек, шу кунларда АҚШнинг Южин шаҳрида енгил атлетика бўйича 18-жаҳон чемпионати давом этмоқда.

Дунёнинг 190 дан зиёд давлатидан 2 минг нафарга яқин спортчи қатнашаётган чемпионатда ҳамюртимиз Сафина Саъдуллаева жаҳон чемпионатидаги иштирокини муваффақиятли бошлади. 

Токио-2020 олимпия ўйинлари иштирокчиси бўлган спортчимиз енгил атлетиканинг баландликка сакраш йўналишида “А” квалификация гуруҳида иштирок этди ва  финал йўлланмасини қўлга киритди. 

Айтиш жоизки, чемпионат дастурига биноан енгил атлетикачилар чемпионатнинг финал босқичида қатнашиш ҳуқуқини қўлга киритишлари учун 1.93 метр баландликни забт этишлари лозим.

Сафина Саъдуллаева айни маррани забт этди. Яъни, ўрнатилган барча тўсиқлардан бир уринишда ўта олди. Энди у 19 июль куни жаҳон чемпионати медаллари учун курашни давом эттиради.

Жорий йилнинг 15 июлида бошланган жаҳон чемпионатида 49 та медаллар жамланмаси ўйналмоқда. Ундан 24 тадан медаллар жамланмаси эркаклар ва аёллар ўртасида, 1 таси эса аралаш гуруҳлар орасида тақсимланади.

Мусобақалар 24 июлгача давом этади.

Т. Рўзиев, ЎзА.