“Tadbirkor qizning eng yaxshi loyihasi” tanlovining Qoraqalpog‘iston Respublikasi bosqichida 17 tadbirkor qiz ishtirok etdi.

“Tadbirkor qizning eng yaxshi loyihasi” tanlovining Qoraqalpog‘iston Respublikasi bosqichida 17 tadbirkor qiz ishtirok etdi.

“Go‘zal va betakrorimsan, muqaddas Vatanim, jonim senga fido, O‘zbekistonim!” shiori ostida Qoraqalpog‘iston Respublikasi xotin-qizlar qo‘mitasi, Markaziy bankning Qoraqalpog‘iston Respublikasi bosh boshqarmasi, Savdo-sanoat palatasi hududiy boshqarmasi, “Tadbirkor ayol” uyushmasi Qoraqalpog‘iston Respublikasi bo‘limi va boshqa tashkilotlar hamkorligida tashkil etilgan tadbirda Prezidentimiz rahnamoligida kichik biznes va xususiy tadbirkorlikni rivojlantirish, xotin-qizlar, ayniqsa, kasb-hunar kollejini bitirayotgan qizlarni tadbirkorlikka jalb etish, ularning bu boradagi bilim va ko‘nikmasini yuksaltirishga qaratilayotgan alohida e’tibor yuksak samaralar berayotgani ta’kidlandi.

Loyihalari eng yaxshi, deb topilgan 6 qiz tanlovning mamlakat bosqichiga yo‘llanma oldi. Ularga tashkilotchilar tomonidan diplom va esdalik sovg‘alar topshirildi.

G‘oliblar safida mo‘ynoqlik Begzoda Qoratoyeva ham bor. U bankdan oladigan 6 million so‘mlik imtiyozli krediti hisobidan chorvachilikni rivojlantirishni maqsad qilgan.

– Loyiham amalga oshsa, bir necha tengdoshim ishli bo‘ladi, – deydi B.Qoratoyeva. – Yurtimizning chekka hududi bo‘lgan Mo‘ynoq tumanida ham biz, yoshlarning iste’dod va salohiyatimizni yuzaga chiqarish uchun zamonaviy sharoitlar yaratilgan. Imkoniyatlardan samarali foydalanib, chorvachilik rivoji uchun qulay sharoit mavjud tumanimizda aholi farovonligini yuksaltirishga hissa qo‘shishni maqsad qilganman.