Har yili yurtimizda 1 aprel - Xalqaro qushlar kuni keng nishonlanadi. Sana munosabati bilan turli targ‘ibot tadbirlari, davra suhbatlari, uchrashuv va tanlovlar o‘tkaziladi.

Joriy yilda ham yoshlarda ona tabiatga mehr-muhabbat tuyg‘usini kuchaytirish va qushlar olamiga qiziqishini oshirish maqsadida Tabiat resurslari vazirligi tomonidan “Qushlarni asraylik” respublika tanlovi e’lon qilingan edi. Tanlov doirasida viloyatdagi maktab o‘quvchilari “Eng yaxshi innovatsion qush uyasi” loyihasida faol ishtirok etdi.  

– Tanlovni o‘tkazishdan maqsad qush uyalarini yasashda ishtirokchilarning innovatsion va kreativ g‘oyalari asosida ishlashi orqali yoshlarning qushlarga bo‘lgan munosabatini yaxshilash hamda ularni keng ommaga taqdim etish, yoshlarni har tomonlama qo‘llab-quvvatlashdan iborat, –deydi Tabiat resurslari vazirligi Navoiy viloyati boshqarmasi boshlig‘i o‘rinbosari Nurali Boltayev. – 1906 yil 1 aprelda qushlarni himoya qilish maqsadida Qushlarni muhofaza qilish bo‘yicha Xalqaro konvensiya imzolangan. Bu dunyo miqiyosida qabul qilingan dastlabki ekologik hujjatlardan biri hisoblanadi. Shundan beri ushbu sana jahonning ko‘pgina mamlakatlarida ekologik jamoatchilik va aholi tomonidan Xalqaro qushlar kuni sifatida nishonlanib kelinmoqda.  

bugungi kunda O‘zbekiston faunasida qushlarning 19 turkumiga oid 450 dan ko‘proq turi ma’lum. Jumladan , respublikamiz tabiatida o‘rmon qushlari, cho‘l va dasht qushlari, suv havzalari (suvda suzuvchi) qushlari, botqoq va sohil qushlari, ko‘chib yuruvchi va o‘troq qushlar kabi ekologik guruhlarga kiruvchi turlari ko‘p uchraydi.  

– Qushlarning tabiat va inson hayotidagi ahamiyati xilma-xil bo‘lib, o‘simliklarni changlantirish, ular urug‘larini tarqatish, zararkunanda hashoratlar va kemiruvchilarni kamaytirishga xizmat qiladi, – deydi tanlovning faol ishtirokchilaridan biri Behruz Kamoliddinov. – Qushlarning tabiatdagi estetik ahamiyatini alohida ta’kidlashni istardim. Ularning sayrashi insonda zavqlanish hissini uyg‘otadi. Bog‘ va xiyobonlarning go‘zalligi va tarovatini yanada oshiradi.

Tanlovda turli yoshdagi 50 nafar o‘quvchi faol ishtirok etdi va ularning barchasiga tashkilotchilarning “Tashakkurnoma” va estalik sovg‘alari topshirildi.

Eng faol 3 nafar ishtirokchiga esa Tabiat resurslari vazirligining estalik sovg‘alari berildi.

A.Bo‘riyev, O‘zA