Давлатимиз раҳбарининг 2021 йил 26 мартдаги "Жамоат хавфсизлигини таъминлаш ва жиноятчиликка қарши курашиш соҳасида ички ишлар органлари фаолиятини сифат жиҳатдан янги босқичга кўтариш чора-тадбирлари тўғрисида"ги фармонида кўрсатиб ўтилганидек, жамоат хавфсизлигини таъминлаш, ҳуқуқбузарликларнинг олдини олиш ва жиноятчиликка қарши курашишнинг яхлит тизимини шакллантириш, энг асосийси, соҳага замонавий иш услубларини жорий этиш орқали ҳуқуқ-тартибот ва қонунийликни мустаҳкамлаш, аҳолининг тинчлиги ва осойишталигини таъминлаш мақсадида Сирдарё вилояти ички ишлар органларида хизмат олиб бораётган раҳбар ходимлар ўртасида “Энг яхши ҳудудий ички ишлар органи бошлиғи” номинацияси бўйича кўрик-танлов ташкил этилди.

– Ўзбекистон Республикаси ИИВ Маънавий-маърифий ишлар ва кадрлар билан таъминлаш департаментининг тегишли кўрсатмасига асосан ўтказилган кўрик-танлов кўп шартли бўлиб, иштирокчилар ўзларининг жисмоний тайёргарлик даражасини намойиш этиб, тўсинда тортилиш, 100 метр ҳамда 1000 метрга югуриш бўйича синовлардан ўтиб, Макаров пистолети ҳамда АК-74 автоматини тўлиқсиз қисмларга ажратиш ва йиғиш, қўл жанги усулларини қўллаш ҳамда электрон тирда ўқ отиш бўйича жанговар тайёргарлик баҳсларида ўзларининг иқтидорларини намоён этди,–дейди Сирдарё вилояти ИИБ ахборот хизмати бошлиғи, подполковник Достонбек Шамсидинов. – Шундан сўнг, иштирокчилар индивидуал психологик хусусиятлари даражасини аниқлашга қаратилган тест синовларидан, кўрик-танлов комиссияси аъзоларининг якка тартибдаги суҳбатларидан ўтказилди.

Қизғин ва муросасиз ўтган кўрик -танлов якунларига кўра, 3-ўринни Боёвут тумани ИИБ бошлиғи, подполковник Ўткир Бегимов, 2-ўринни Сардоба тумани ИИБ бошлиғи, подполковник Жасур Саибов, фахрли 1-ўринни эса Оқолтин тумани ИИБ бошлиғи, подполковник Хуршид Жавлонов қўлга киритди.  

Ғулом Примов,

ЎзА мухбири