Андижон вилояти халқ таълими бошқармаси ташаббуси билан вилоятдаги умумтаълим мактабларида кимё фани кунлари ўтказилди.
Ўқувчиларнинг кимё фанига бўлган қизиқишини ошириш, фан ўқитувчиларнинг илғор иш услублари ҳамда тажрибаларини оммалаштириш, ўзаро ҳамкорлигини мустаҳкамлаш мақсадида ўтказилган кимё фани кунлари доирасида Шаҳрихон туманидаги 44- ихтисослашган умумтаълим мактабида ўқитувчилар ўртасида кимё фанлари доктори, профессор, Ўзбекистон халқ табобати академияси раиси Иброҳимжон Асқаров номидаги кимё фани олимпиадаси ташкил этилди.
Дастлаб кимё фани ўқитувчиларига профессор Иброҳимжон Асқаров ҳамда Ўзбекистон Қаҳрамони, доцент Камолиддин Ғопиров томонидан маҳорат дарси ўтилди.
Дарс давомида ўқитишдаги илғор иш услублари, дарс ўтишга интерактив ёндашиш, дарс жараёнида илғор педагогик технологиялардан самарали фойдаланиш сингари қатор мавзулар бўйича савол-жавоблар бўлди, таклиф, фикр ва мулоҳазалар билдирилди.
[gallery-2058]
– Аввал профессор Иброҳимжон Асқаров номидаги фан олимпиадаси ўқувчилар ўртасида ўтказилган эди, – дейди Андижон вилояти халқ таълими бошқармаси бошлиғи Азизбек Миркомилов.
– Фан ойлиги кунлари доирасида ташкил этилган фан олимпиадасида энди ўқитувчиларимиз ўз билимларини синовдан ўтказди. Бу ноанъанавий тадбир нафақат ўқитувчиларни рағбатлантиришга, балки энг илғор ва фаол ўқитувчиларни аниқлаш, уларнинг тажрибаларини оммалаштиришда муҳим аҳамият касб этади.
Мазкур фан олимпиадаси баҳсларида унинг туман ва шаҳар босқичларида ғолибликни қўлга киритган касбининг билимдон ва фидойиси бўлган ўқитувчилар иштирок этди. Якуний натижаларига кўра, Марҳамат туманидаги 10- умумтаълим мактаби ўқитувчиси Рашидбек Бўриев, Булоқбоши туманидаги 9-умумтаълим мактаби ўқитувчиси Муслимбек Буваматов, Пахтаобод туманидаги 32-ДИМИ ўқитувчиси Абдулҳамид Қўшмонов, Балиқчи туманидаги 28-умумтаълим мактаби ўқитувчиси Наргиза Эргашева ғолиблар қаторидан жой олди.
Ғолиб ва совриндорлар пул мукофоти, эсдалик совғалар ҳамда профессор Иброҳимжон Асқаров муаллифлигидаги китоблар жамланмаси билан тақдирланди.
Ф. УБАЙДУЛЛАЕВ, З. УМРЗОҚОВ (сурат), ЎзА