Андижон вилояти Марҳамат тумани ҳокимининг ташаббуси билан “Энг кўп китоб ўқиган ўқувчи” китобхонлик танлови ўтказилмоқда.

Мактаб, ҳудудий ва туман босқичида ўтказиладиган танловда тумандаги умумтаълим мактабларининг 7-11 синф ўқувчилари иштирок этади.

– Китоб инсон тафаккурини чарҳловчи энг ноёб воситадир, – дейди Марҳамат тумани ҳокими Бобуржон Юлдашев. – Китоб ҳамма даврларда  инсонларга яқин дўст, ҳамроҳ ва доно маслаҳатчи бўлиб келган. Ёшларнинг китоб ўқишга бўлган қизиқишини ошириш, мутолаа маданиятини юксалтириш мақсадида ўтказилаётган танловда ўқувчилар фаол қатнашаётгани қувонарли.

Айни пайтда туманда 45 та умумтаълим мактаби бўлиб, мактабларнинг 7-11 синфларида қарийиб 12 минг нафар ўқувчи таҳсил олади.

Танлов доирасида ўқувчиларга ўқиб чиқилган бўлиши керак бўлган мумтоз, замонавий ўзбек адабиёти, шунингдек, жаҳон адабиётининг энг сара асарлари рўйҳати тавсия этилган.

Якунда танлов ғолибига 15 миллион сўм, иккинчи ўрин соҳибига 10 миллион сўм ва учинчи ўринни эгаллаган ўқувчига 5 миллион сўм мукофот пули берилиши, шу билан бирга, ўқувчиларнинг устозлари ҳам рағбатлантирилиши белгиланган.

– “Энг кўп китоб ўқиган ўқувчи” китобхонлик танловининг ўтказилаётганлигидан мен каби кўплаб ўқувчилар жуда хурсанд, - дейди тумандаги 43-умумтаълим мактабининг 11-синф ўқувчиси Сарвиноз Холматжонова. - Чунки шахсан мен ҳозирга қадар жуда кўп китобларни, хусусан, танлов доирасида ўқиш учун тавсия этилган китобларнинг аксариятини ўқиб чиққанман. Танлов биз - ўқувчиларнинг китоб ўқишга бўлган қизиқишини шубҳасиз, янада оширади.

Танловнинг якуний босқичи Конституция куни арафасида ўтказилади.