Энергия тежамкорлиги – тараққиёт кафолати! Мазкур шиор мамлакатимизда аллақачон ўз тасдиғини топди, десак муболаға бўлмайди. Республикамизда бу борада амалиётга татбиқ этилаётган чора-тадбирлар эса халқаро тажрибалар уйғунлигида амалга оширилмоқда.

Бу ҳақда «Ўзбектелеком» акциядорлик компаниясида «Энергия тежамкорлигини таъминлаш» мавзусида бўлиб ўтган семинарда сўз юритилди. Тадбирда Ўзбекистон Республикаси Вазирлар Маҳкамаси ҳузуридаги Энергия самарадорлиги миллий агентлиги мутахассислари, Компания раҳбарияти ва ходимлари иштирок этишди.

Дарҳақиқат, энергия ресурсларини тежаш, улардан оқилона фойдаланиш ва бу орқали экологик барқарор ривожланишни таъминлаш давр талабига айланган. Семинарда таъкидланганидек, анъанавий турда электр энергияси ишлаб чиқариш – экологик барқарорликка зид кўрсаткич. Шу боис, бугунги кунда мамлакатимизда қайта тикланувчи энергия манбаларига оид ўнлаб йирик инвестицион лойиҳалар амалга оширилмоқда.

Семинарда «Энергия тежамкорлиги: концепция ва аҳамияти», «Замонавий технологиялар ва ечимлар», «Энергия самарадорлигини ошириш учун амалга ошириладиган тадбирлар» ва «Ишлаб чиқариш ва истеъмолда энергияни тежашнинг амалий йўллари» каби мавзуларда маърузалар қилинди.

Хусусан, иш жойи ва хонадонларда фойдаланилмаётган электр жиҳозлари ҳамда ёритиш ускуналарини тармоқдан узиб қўйиш, хоналарни ёритишда кўпроқ табиий ёруғликдан (қуёш нуридан) фойдаланишга одатланиш, шунингдек, кўча, маҳалла ва жамоат жойларида электр энергияси сарфида тежамкорликни йўлга қўйиш борасида жамоатчилик назоратини ўрнатиш мақсадга мувофиқлиги айтиб ўтилди.