Айни кунларда “Ўзэнергоинспекция” томонидан иқтисодиёт тармоқларида энергия ресурсларидан фойдаланиш самарадорлигини ошириш мақсадида энергетика корхоналарининг мажбурий энергия аудитидан ўтказилиши юзасидан назорат тадбирлари амалга оширилмоқда.

Унга кўра, 2025 йилда Давлат энергетика реестрига киритилган 357 та корхона энергия аудитидан мажбурий равишда ўтказилиши кўрсатиб ўтилган. Назорат тадбирларида маълум бўлишича, улардан 31 та корхона ҳозирга қадар энергия аудитини ўтказиш ишларини умуман бошламаган.

Шу сабабли, энергия аудитини ўтказиш бўйича белгиланган талабларни ўз вақтида бажармаган ушбу корхоналарга нисбатан Вазирлар Маҳкамасининг 2024 йил 19 октябрдаги қарорига мувофиқ, етказиб берилган электр энергияси ва табиий газ учун белгиланган тарифларга 1,5 баравар миқдорда ўсувчи коэффициент қўлланилди.

Инспекция ахборот хизматига кўра, Давлат энергетика реестрига киритилган корхоналар томонидан мажбурий энергия аудитини ўтказиш талабларининг бузилиши қонунчиликда белгиланган жавобгарликка сабаб бўлади.

Н.Зиёдуллаева тайёрлади, ЎзА