Энергетика соҳасида барқарорликни таъминлаш ва аҳоли ҳамда иқтисодиёт тармоқларининг энергия эҳтиёжини қоплаш давлат учун устувор вазифалардан бири ҳисобланади. Шу кунлардаги кўрсаткичлар эса электр энергияси ва газ таъминотида самарали режалаштириш ва тезкорлик билан назоратни таъминлаётганини кўрсатмоқда.

Хусусан,  кеча, 22 январь куни электр станциялари орқали жами 270,7 миллион кВт·соат, режадагига нисбатан 105 фоиз кўп электр энергияси ишлаб чиқарилди. Республика истеъмолчиларига 244,6 миллион кВт·соат, режадагига нисбатан 101 фоиз кўп электр энергияси етказиб берилди. Табиий газ истеъмоли 152,3 миллион метр кубни ташкил қилди.  

Автомобилларга газ тўлдириш компрессор шохобчаларига махсус техникалар ва жамоат транспортлари учун 1,7 миллион метр куб табиий газ етказиб берилди. 2 минг 300 тонна суюлтирилган газ ишлаб чиқарилди. Бу режага нисбатан 109 фоиз кўп. Аҳоли ва ижтимоий соҳа объектларига 1 минг 900 тонна суюлтирилган газ етказиб берилди. Ҳудудлардаги газ тўлдириш шохобчаларида 6,5 минг тонна суюлтирилган газ захираси яратилган.

– Автобензин ва дизель ёнилғиси ҳам аҳоли ва иқтисодиёт тармоқлари эҳтиёжини қоплайдиган даражада етказиб берилмоқда. Хусусан, 22 январь куни биржа савдоларига жами 11 845 тонна автобензин ва 15 788 тонна дизель ёнилғиси чиқарилиб, шундан 4 678 тонна бензин ва 624 тонна дизель ёнилғиси сотилган. Шунингдек, биржа савдоларига 2 190 тонна суюлтирилган газ чиқарилиб, шундан 2 128 тоннаси сотилган. Кеча электр қурилмаларида юзага келган 14 та, газ таъминотида эса 3 та носозлик авария бригадалари томонидан тезкорлик билан бартараф этилган. Тизим 24/7 режимида кучайтирилган тартибда ишлаб, авария бригадалари томонидан носозликлар бартараф этилган ҳолда таъминотни босқичма-босқич тиклаш чоралари кўрилмоқда, – деди  Энергетика вазирлиги ахборот хизмати раҳбари Дилдора Ҳошимова.

Н.Зиёдуллаева, ЎзА