“Ўзэнергоинспекция”нинг марказий аппарати ва барча ҳудудий бошқарма ходимлари иштирокида ташкил этилган йиғилишда жорий йилда амалга оширилган ишлар, йўл қўйилган хато ва камчиликлар атрофлича муҳокама қилинди.

Йиғилишда асосий эътибор соҳада қонун ҳужжатлари ижроси ва коррупциянинг олдини олишга қаратилди. Хусусан, соҳада коррупциянинг олдини олиш бўйича амалга оширилган чора-тадбирлар танқидий таҳлил қилинди. 

Унда ёш ва тажрибали ходимлар ҳамда раҳбарлар бирлашган ҳолда, тизимда коррупцияга имкон бермаслик ва унинг ҳар қандай кўринишларининг олдини олиш чоралари кўрилиши лозимлигини қайд этди. 

Йиғилишда таъкидланганидек,  барча иштирокчилар соҳага доир қонун ҳужжатлари юзасидан тадбиркорлик субъектларида ўтказиладиган текширувларни тўғри ташкил этиш, шунингдек, янги тартиблар ва норматив ҳужжатларни амалиётда тўғри қўллаш муҳим аҳамиятга эга. Бу орқали барча текширувлар шаффоф ва очиқ тарзда амалга оширилиши, коррупция учун замин яратилмаслиги таъминланади. 

Шунингдек, истеъмолчилар орасида энергия ресурсларини самарали ишлатиш ва талон-торож ҳолатларининг олдини олиш мақсадида профилактик тарғибот тадбирлари кучайтирилди, шунингдек энергетика объектларида куз-қиш мавсумига тайёргарлик ишлари юзасидан кўрсатмалар берилди. Бу ҳам ўз навбатида соҳада коррупция ва маблағлардан самарасиз фойдаланиш ҳолатларини камайтиришга хизмат қилади. 

Кун тартибидаги масалалар юзасидан ҳудудий бошқармалар масъулларининг ҳисоботлари эшитилди ва келгусида эътибор қаратилиши лозим бўлган устувор йўналишлар, жумладан, коррупцияга қарши чора-тадбирлар белгиланди. 

Йиғилиш якунида белгиланган вазифаларнинг ижросини таъминлаш бўйича аниқ кўрсатмалар берилди.

Н.Зиёдуллаева, ЎзА