Бугун – 27 октябрдан Ўзбекистон Республикаси мобил алоқа тармоқларида абонент рақамини кўчириш хизмати ишга туширилди. Оддий қилиб айтганда, эндиликда мижозлар ўз рақамини сақлаб қолган ҳолда мобил операторни алмаштириш имконига эга бўлади.

Хўш ушбу тартиб қандай амалга оширилади? Мижозлар учун афзалликлари нимада? Рақамли технологиялар вазирлиги бўлим бошлиғи Валихон Усмонов ЎзА мухбирини қизиқтирган шу каби саволларга жавоб берди.  

—Ҳозирги кунда Ўзбекистонда Beeline, Mobi.uz, Ucell, Uztelecom, Humans каби 5 та мобил алоқа оператори фаолият кўрсатади, — дейди В.Усмонов. — Мазкур хизматнинг ишга туширилиши мамлакатимизда фаолият юритиб келаётган мобил алоқа операторлари ўртасида соғлом, ижобий рақобатни янада кучайтириш билан бирга, улар томонидан кўрсатилаётган хизматлар сифатининг ошишига олиб келади.  

— Мобил рақамни бир компаниядан иккинчи компанияга  кўчириш тартиби қандай?  

— Биринчи босқичда мижоз қайси компанияга ўтмоқчи бўлса, ўша компанияга бориб, операторга паспорти билан мурожаат қилади. Мурожаат асосида янги SIM-карта олишга қанча вақт сарфланса, ўша вақт оралиғида  рақам ва код номери сақланган SIM-карта берилади.    

Бешта компаниянинг код рақамлари ҳар хил. Бошқа компанияга ўтишда ҳеч қандай муаммолар бўлмайди. Мисол учун, (97) код фақатгина Mobi.uz да бор, бошқа компанияларда бу код рақами йўқ.  

—Мижозлар мобил компанияларни неча марта алмаштириш имкониятига эга?  

— Бошқа компанияга ўтилаётган пайтда мижозга шартнома берилади. Ўша шартномада белгиланган шартларга қараб, тўловлар ҳамда фойдаланиш муддати келишилади. Битта компания хизматидан камида 30 кун фойдаланиш талаб этилади. Бу компания хизмати ёқмаган бўлса, ўттиз кундан кейин бошқа компанияга ўтишингиз мумкин.  

—Хизмат кўрсатишнинг бундай турини жорий қилишдан мақсад нима?  

— Мисол учун, сиз ҳозир ишлатиб турган рақамингизни кўпчилик танишларингиз, яқинларингиз билади. Фойдаланиб турган компаниянгиз хизмат сифати сизга маъқул келмасада, танишларингизни йўқотиб қўйишдан қўрқиб, рақамингизни ўзгартира олмайсиз. Энди рақамингиз ва унинг кодини ўзгартирмаган ҳолда сифати, нархлари, таърифи бўйича сизга маъқул келадиган компанияга ўтишингиз мумкин.  

Нигора Раҳмонова, ЎзА