Маълумки, Сенатнинг навбатдаги ялпи мажлисида “Экологик экспертиза, атроф-муҳитга таъсирни баҳолаш ва стратегик экологик баҳолаш тўғрисида”ги қонун лойиҳаси кўриб чиқилиб, маъқулланган эди.

Соҳа вакилларининг таъкидлашича, экологик экспертизанинг ҳужжатлари салкам 25 йил олдин қабул қилинган “Экологик экспертиза тўғрисида”ги қонун ва бошқа қонун ости ҳужжатлар асосида амалга ошириб келинган. Бу эса ўз навбатида амалдаги ҳуқуқий ҳужжатлар тарқоқ, қатор нормалар эса ҳавола хусусиятига эга эканини, соҳани тартибга солишнинг халқаро талабларга мос бўлган ҳуқуқий механизмлари жорий этилмаганини кўрсатади.  

Янги қонунда бир қанча зарурий вазифалар  ўз аксини топган. Хусусан, “Электрон ҳукумат” принципларига асосан атроф-муҳитга таъсирни баҳолаш бўйича ягона автоматлаштирилган ахборот тизимининг ҳуқуқий асослари белгилаб берилмоқда. Ушбу механизм тадбиркорлик субъектлари учун экологик экспертизага оид материалларни онлайн тарзда тақдим этиш ва экологик экспертиза хулосаларини олиш имкониятини беради.  

Мазкур ҳужжат бугунги кун талабларидан келиб чиққан ҳолда тайёрланган бўлиб, унда экологик экспертизанинг атроф-муҳитга таъсирини баҳолаш ва стратегик экологик баҳолашнинг тушунчалари, мақсадлари, асосий принциплари, махсус ваколатли давлат органи ҳамда унинг ваколатлари, экологик экспертизанинг турлари, объектлари, субъектлари, экологик нормативлар лойиҳаларини ишлаб чиқиш ва расмийлаштириш масалалари акс этган.     

Янги қонунда белгиланган вазифалар хусусида Давлат экологик экспертизаси маркази мутахассиси Дурбек Фармонов маълумот берди.  

<iframe width="640" height="480" src="https://www.youtube.com/embed/_QAShKqcsc4?si=yl97g11_FSSqRNzO" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳайё Тошқораева, Анвар Аҳмедов,
ЎзА