Давлатимиз раҳбарининг 2025 йил май ойида Словенияга ташрифи давомида мазкур давлат билан меҳнат миграцияси соҳасида тизимли ҳамкорлик қилиш учун тил, касбий кўникма ва меҳнат стандарти бўйича ўқитиш ҳамда мослаштириш дастурлари ишлаб чиқишга доир келишувга эришилган эди. Бу меҳнат миграцияси масаласида янги саҳифа очилишига замин яратди.

Ташрифдан сўнг амалий ишлар йўлга қўйилди. Форумлар, B2B учрашувлари ўтказилди, “Йўл харитаси” ва иш берувчилар билан тўғридан-тўғри келишувлар имзоланди.

Натижада танловдан муваффақиятли ўтган ҳамюртларимиз илк бор Словенияга вақтинча меҳнат фаолиятини олиб бориш учун жўнаб кетмоқда. Улар қурилиш, йўл қурилиши, ҳайдовчилик йўналишларида фаолият олиб боради.

– Ўтган йил бўлиб ўтган ярмаркада қатнашиб, Словения давлатига ишга бориш учун Миграция агентлиги томонидан ташкил этилган танловдан сўнг иш берувчи билан шартнома имзоладик, – дейди сирдарёлик Турғун Раҳимбердиев. – Ҳужжатларни расмийлаштириш, виза олиш билан боғлиқ барча жараён агентлик ходимлари ва иш берувчи томонидан амалга оширилганлиги боис, ҳеч бир қийинчикка учрамадик.

Турар жой, овқатланиш, тиббий суғурта, виза ва йўл харажати иш берувчи ҳисобидан қопланди. Бошланғич маош сифатида ишчиларга 1200-1600 евро оралиғида ойлик таклиф этилган.

2025 йил ҳолатига кўра, Словения рекорд даражада паст – тахминан 3.2-3.5 фоиз ишсизлик ва табиий равишда ўта юқори бандлик даражасига эга. Айни ҳолат маҳаллий меҳнат бозорида бўшлиқ келтириб чиқарган. Қурилиш, соғлиқни сақлаш, меҳмонхона ва ресторан бизнеси, ишлаб чиқариш, таълим ва ахборот технологиялари йўналишларида ишчи кучи етишмовчилиги яққол кузатилади.

Бу хорижликлар, жумладан Ўзбекистон фуқаролари учун ҳам яхши имконият, дегани. Демак, ҳозирнинг ўзида касб ва тил талабига жавоб берадиган 1500 нафардан кўп ҳамюртимиз Словенияда иш топиши мумкин.

Г.Сатторова, ЎзА