Австралия “яшиллар” партияси етакчиси Эдам Брандт жамоатчиликнинг безовталигига сабаб бўладиган таклифни илгари сурди. Унинг таъкидлашича, Елизавета II вафотидан кейин мамлакат конституцион манархиядан кечиб, республика бўлиши керак, деб хабар тарқатди Sky News Australia телеканали.

Аввалроқ Брандт Twitter ижтимоий тармоқдаги саҳифасида "Тинчликда ётинг малика Елизавета II. Энди Австралия олдинга қараб ҳаракат қилиши керак. Бизга маҳаллий аҳоли билан шартнома зарур ва энди республика бўлишимиз керак", деб ёзганди. Телеканалнинг таъкидлашича, бошқа сиёсатчилар Брандтни марҳум қироличага ҳурмат сақлашга чақирган.

Брэндтни “яшиллар” партиясидан парламент аъзоси Лидию Торп ҳам қўллаб-қувватламоқда. У август ойида қасамёд қабул қилганда Англия қироличасини "колонизатор", деб атаганди. Австралиянинг 1901 йилда қабул қилинган конститутциясига биноан, мамлакат конституцион манархия ҳисобланади ва қироллик тожи манфаатларини у ерда генерал-губернатор ҳимоя қилади. Мамлакат ҳукуматини эса бош вазир бошқаради.

1999 йилда Австралияда ҳатто референдум ўтказилган эди, унинг натижаларига кўра, австралияликларнинг аксарияти ўз давлати тузилишида ҳеч қандай ўзгартириш шарт эмаслигини ёқлаб чиққанди.