Футбол бўйича Элит Осиё чемпионлар лигасининг ғарбий минтақасида умумий босқичнинг учинчи тур учрашувлари якунланди.

Мазкур турнинг сўнгги кунида Қаршининг “Насаф” жамоаси сафарда БААнинг “Шабаб Ал-Аҳли” клубига 1:4 ҳисобида имкониятни бой бериб қўйган бўлса, “Ал-Ҳилол”  3:1 ҳисобида “Ал-Садд” устидан зафар қучди.  

Натижада “Ал-Ҳилол” мусобақа жадвалида 9 очко тўплаб, яққол пешқадамга айланиб олди. “Ал-Аҳли”, “Шабаб Ал-Аҳли” ва “Ал-Ваҳда” клублари бир хил - 7 очко тўплаган ҳолда голлар нисбатига кўра 2-4 поғоналардан жой олган бўлса, “Трактор” 5 очко билан бешинчи ўринга кўтарилиб олди.

Шунингдек, “Ал-Шаржа” 4, “Ал-Иттиҳод” ва “Ал-Гарафа” 3 очкога эга бўлиб, кучли саккизталикни якунлаб берди. “Ал-Садд” сафардаги мағлубиятдан сўнг 2 очко билан 9-ўринга тушиб кетди. Ҳисобида 1 очкодан бўлган “Ал-Духаил” ҳамда “Ал-Шорта” клублари 10-11 ўринларда қайд этилди. Афсуски, “Насаф” кетма-кет учта ўйиндаги мағлубият эвазига сўнгги ўринда қолмоқда.

Элит Осиё чемпионлар лигасининг ғарбий минтақасида умумий босқичнинг 4-тур учрашувлари 3-4 ноябрь кунлари бўлиб ўтади. Унда қуйидаги ўйинларга гувоҳ бўламиз:

3 ноябрь: “Насаф” – “Ал-Ваҳда”, “Ал-Духаил” – “Ал-Аҳли”, “Трактор” – “Ал-Шорта”, “Ал-Гарафа” – “Ал-Ҳилол”;

4 ноябрь: “Ал-Садд” – “Ал-Аҳли”, “Ал-Иттиҳод” – “Ал-Шаржа”.

Жавоҳир Тошхўжаев,

ЎзА