2020/21-ўқув йили бошланишидан олдин Халқ таълими вазирлиги Kundalik тизимига уланган мактаб ўқувчиларининг ота-оналарига қоғоз кундалик сотиб олмасликлари, унинг ўрнига электрон муқобилига обуна бўлиш лозимлигини маълум қилган эди.
Электрон Kundalik платформасига йиллик обуна нархи қоғоз кундаликнинг ўртача нархига тенг — 9 200 сўм. Уч ва ундан ортиқ фарзанди бор оилалар учун 10 фоизлик чегирма мавжуд
Ушбу миқдорни тўлаб, ота-она ва ўқувчининг истаган бошқа яқин қариндошлари бир календарь йил давомида боланинг мактаб ҳаётини кузатиш имконига эга бўлади
Маълумотларга кўра, бу электрон тизим 2018 йилдан 235 та мактабда синовдан ўтишни бошлаган. Аввал, 3 та синфдаги синовлар яхши ўтгач, 54 та мактабда ҳам йўлга қўйилган. Пандемия даврида 1200 та мактабда Kundalik тизими жорий этилди.
Вазирлик ўз ўрнида Kundalik тизими ўқувчи ва ўқитувчилар учун қулай эканлигини айтмоқда. Бугунги кунга қадар электрон Kundalik тизимида рўйхатдан ўтган мактаблар сони 1557 та бўлиб, шундан 1482 та мактаб қоғоз журнал ва кундаликдан бутунлай воз кечган.
Халқ таълими вазирлиги Kundalik тизимини жорий этиши юзасидан одамларда бир қанча савол ва баҳсли мунозаралар туғилмоқда. Kundalik тизими пуллик эканлиги ва бу хизмат хорижий хусусий фирма томонидан бажарилаётгани кўпгина саволларга сабаб бўлмоқда.
ҲАР КИМ БEПУЛ ТАЪЛИМ ОЛИШ ҲУҚУҚИГА ЭГА. ЭЛEКТРОН КУНДАЛИК УЧУН ТЎЛОВ БОЛАНИНГ БУ ҲУҚУҚИНИ ЧEКЛАМАЙДИМИ?
Кундалик ёки бошқа ўқув анжомлари мактаб томонидан бепул берилмайди; ота-оналар ҳар доим ўз фарзандлари учун зарур бўлган барча нарсаларни ўзлари харид қилиб келишган. Электрон кундаликнинг жорий этилиши билан қоғоз кундаликдан воз кечилмоқда. Бунда қоғоз кундаликнинг ўртача баҳоси ҳисоби олиниб, унинг электрон муқобилига йиллик обуна 9200 сўмга баҳоланмоқда. Шуларни инобатга олиб Халқ таълими вазирлиги жорий ўқув йили бошланишидан олдин электрон кундалик жорий этилаётган мактабларнинг ота-оналарига қоғоз кундалик сотиб олмасликни сўраб мурожаат қилган.
ЭЛEКТРОН КУНДАЛИК ОТА-ОНАЛАРГА, ЎҚИТУВЧИЛАРГА ВА БОЛАГА НИМА БEРАДИ?
Кундаликнинг электрон талқини ота-онага ва боланинг бошқа яқинларига дарсларни, уй вазифаларни, болаларнинг давоматини уйдан чиқмасдан туриб, ишдан чалғимаган ҳолда ва ҳатто чет элда туриб ҳам назорат қилиш имкониятини беради.
Ушбу кундалик ёрдамида ота-онада боланинг уй вазифаси, давомади, шарҳлар, баҳолар, мактаб ҳаётидан доимий хабардор бўлиш имконияти мавжуд. Агар уй вазифасини бажариш жараёнида болада савол туғилса, у ўқитувчисига тизим орқали тўғридан-тўғри мурожаат қилиши ҳам мумкин. Ўқитувчи эса, ўз навбатида, ўқувчиларга қўшимча ўқув материалини тақдим этиши, видео дарсига ҳавола юбориши мумкин бўлади. Ота-оналар танлаш ҳуқуқига эгалар: улар ушбу тизим орқали фарзандларининг билим олиш даражасини назорат қилиши ва бу билан унинг сифатини ошириб бориши ёки электрон кундаликдан воз кечган ҳолда боланинг баҳоларини мактабга борганда билиб туришлари мумкин. Мажбурий талаблар йўқ.
Электрон кундаликнинг афзалликлари жуда кўп. Бу биринчи навбатда ўқитувчининг вақтини тежашдир. Ўқитувчилар эндиликда қоғоз журналини тўлдирадиган вақтини ўзи ва ўқувчилари устида ишлашга сарфлаши мумкин бўлади. Кўп йиллар давомида электрон журнал ва кундалик қўлланилаётган мамлакатлар тажрибаси шуни кўрсатмоқдаки, ўқитувчилар унинг ёрдами билан ҳар чоракда 20 соатдан ортиқ иш вақтини тежай олади.
ҚАНДАЙ АСОСЛАРДА ОТА-ОНАЛАР ХУСУСИЙ КОМПАНИЯ ҲИСОБ РАҚАМИГА ТЎЛОВ АМАЛГА ОШИРИШИ КEРАК?
Халқ таълими вазирлиги ва Кундалик тизими ўртасида давлат-хусусий шериклик асосида шартнома имзоланган бўлиб, бунинг натижасида хусусий сармоя жалб этилган ҳолда давлат бюджет маблағлари тежалади. Тежалган давлат маблағлари мактабларнинг моддий техник базасини ривожлантиришга, яъни компьютер ва интернет билан жиҳозлашга йўналтирилади. Шунингдек, Кундалик компаниясига тушган маблағлар платформанинг техник инфратузилмасини сақлаш, уни ривожлантириш ва кенгайтириш учун сарфланади
Кундалик лойиҳаси тўлиқ Кундалик компанияси маблағлари ҳисобидан молиялаштирилади, маблағлар дастурий таъминотни яратиш, ишлатиш ва сақлашга, тизимни бошқа мактабларда татбиқ этишга сарфланади.
ЭЛEКТРОН КУНДАЛИК ХОРИЖИЙ КОМПАНИЯНИКИ БЎЛСА, БУ БОЛАЛАРНИНГ МАЪЛУМОТЛАРИНИ ХАВФГА ҚЎЙМАЙДИМИ?
Электрон Кундалик фойдаланувчилари тўғрисидаги барча маълумотлар «Ўзбектелеком» серверларида сақланади. Бу эса ўқув жараёнидаги шахсий маълумотларнинг ишончли ҳимоясини таъминлайди. Бундан ташқари, Kundalik.com TAS-IX ҳудудида жойлашган бўлиб, платформа билан ишлашда уяли алоқа операторлари орқали фойдаланилганда интернет-трафик сарфланмайди.
КУНДАЛИК ТИЗИМИ ТЎЛОВ ҚАБУЛ ҚИЛМАСА...
Электрон обунаси учун тўловни 30 ноябрдан эътиборан амалга ошириш мумкин. 23 ноябрдан синов муддатининг охирги 7 куни бошланган. Ота-оналарга ўзларининг профилларидан кириш ва барча фарзандларининг кундаликларини кўра олаётганликларини текширишлари тавсия этилади.
Анора СОДИҚОВА, ЎзА