Электр тармоқларига ноқонуний уланиш ва фойдаланиш ҳолатларининг олдини олиш мақсадида Самарқанд вилоят ҳуқуқ-тартибот органлари ва мутасадди идоралари ҳамкорлигида зарур чора-тадбирлар кўрилмоқда.
Ушбу йўналишда олиб борилган ўрганишларнинг бирида фуқаро А.Х. Вазирлар Маҳкамасининг 2018 йил 12 январдаги “Электр энергияси ва табиий газдан фойдаланиш тартибини такомиллаштиришга доир қўшимча чора-тадбирлар тўғрисида” ги қарори талабларини қўпол равишда бузган ҳолда, таъминотчи корхона рухсатисиз Самарқанд шаҳар электр тармоқлари корхонаси тасарруфида бўлган 316-сонли трансформатор пунктига крипто-активлар майнинг қурилмаларини ноқонуний равишда улаб, фойдаланиб келганлиги аниқланди. Бу хатти-ҳаракати билан фуқаро давлат бюджетига жами 2 миллиард 252 миллион сўм зарар етказган. Мазкур ҳолат юзасидан фуқаро А.Х.га нисбатан Ўзбекистон Республикаси Жиноят кодексининг тегишли моддалари билан жиноят иши қўзғатилиши белгиланди.
Ғ.ҲАСАНОВ, ЎзА мухбири