АОКАда ўтказилган брифингда Энергетика вазирлиги ахборот хизматининг маълумот беришича, қишнинг совуқ кунларида куннинг тиғиз пайтларида электр таъминотида маълум миқдорда чекловлар киритилмоқда.

Хусусан, 29 февраль куни мамлакатимизда 700 МВтгача чекловлар киритилди. Бугун, яъни 1 март куни киритилган энг катта чеклов 365 МВтни ташкил қилди. 

Вазирлик берган маълумотга кўра, бундай чекловларга газ босимининг пасайиши ва эҳтиёжнинг ошиши сабаб бўлмоқда. 

Шунингдек, республика ҳудудлари бўйлаб қишнинг совуқ кунларида истеъмолнинг кўпайиши туфайли электр тармоқлари ҳамда трансформатор пунктларида юкламаларнинг ортиши ҳисобига юзага келаётган носозликлар ҳам тезкор бартараф этиб борилмоқда. 

–Кеча мамлакатимиз бўйлаб электр қурилмаларида юзага келган 6 та, газ таъминотида юзага келган 3 та носозлик бартараф қилинди. Жумладан, кеча Сурхондарё вилоятидаги “Гулча” подстанциясида носозлик юзага келган. Бунинг оқибатида Олтинсой, Узун туманлари ва Денов шаҳридаги 10 минг 200 та абонент электр таъминотидан узилган. Носозлик тўлиқ бартараф этилиб, истеъмолчилар электр таъминотига қайта уланган. Шунингдек, Тошкент шаҳридаги “Ҳосилот” подстанциясида носозлик юзага келган. Натижада Яшнобод туманида истиқомат қилувчи 2 мингта истеъмолчи электр таъминотидан узилган. Соат 23:15да таъмирлаш ишлари якунланиб, истеъмолчиларнинг электр таъминоти тўлиқ тикланди, – деди вазирлик ахборот хизмати раҳбари Ҳасан Тошхўжаев. 

Тадбирда қайд этилишича, электр таъминотидаги узилишлар юзасидан Энергетика вазирлиги тизим ташкилотларига истеъмолчилардан 628 та мурожаат келиб тушган ва барчаси махсус бригадалар томонидан бартараф этилган. Табиий ҳамда суюлтирилган газ таъминоти бўйича келиб тушган 235 та мурожаат бўйича ҳам тегишли тартибда тезкор чора-тадбирлар кўрилган. 

Н.Зиёдуллаева, ЎзА