Техник жиҳатдан тартибга солиш соҳасида назорат инспекциясининг Қорақалпоғистон Республикаси бўлими томонидан Нукус шаҳридаги савдо шохобчаларида сотилаётган, юртимизда ишлаб чиқарилган "Акалон" электр иситиш печи бўйича назорат хариди ўтказилди.

Лаборатория таҳлиллари натижасида "Акалон" электр печи техник регламент, маркировка ва амалдаги стандартлар талабларига жавоб бермаслиги аниқланган.

Маҳсулотда ишлатилган сим кесими талаб этилган 0,75 мм² дан кичик бўлиб, унинг ҳақиқий ўлчами меъёрдан паст экани қайд этилди.

Бундай симлар қизиб кетиши, изоляциянинг эриши ва ёнғин хавфи кескин ошишига сабаб бўлиши мумкин.

Сурхондарё вилояти Термиз туманидаги савдо дўконида сотилаётган DANKOV русумли антифриз бўйича назорат хариди амалга оширилди.

Маҳсулот аккредитацияланган лабораторияда синовдан ўтказилганда, унинг норматив талабларга жавоб бермаслиги маълум бўлди. Қоидаларга кўра, антифризнинг кристалланиши –35 °C ёки ундан паст ҳароратда бошланиши лозим. Аммо, маҳсулот 0 °C да музлайди.

Тадқиқотлар шуни кўрсатадики, бундай сифатсиз антифриз иссиқлик алмашинувини тўлиқ таъминламайди. Натижада двигатель ҳаддан ташқари қизиб кетади, радиатор, насос, трубкалар ва двигатель блокида занг ҳамда турли носозликлар пайдо бўлиши мумкин.

Бу эса автомобилнинг умумий хизмат муддатини кескин қисқартириб, жиддий техник шикастларга олиб келади.

Шу боис, антифриз харид қилаётганда унинг ёрлиғи, ишлаб чиқарувчи мамлакати, техник кўрсаткичлари ва сертификатланганига алоҳида эътибор қаратиш қатъий тавсия этилади.

Ҳамроз Баянов, ЎзА