Energetika vazirligi huzuridagi “O‘zenergoinspeksiya” huquqni muhofaza qiluvchi organlar bilan birgalikda joylarda nazorat tadbirlarini o‘tkazmoqda.

Unda aniqlanishicha, Samarqand shahri So‘g‘diyona mavzesida faoliyat yuritib kelayotgan “Dobusya Samarqand Aqualand” MCHJda elektr energiyasidan noqonuniy foydalanilgan. Ya’ni, ushbu tadbirkorlik sub’ektiga tegishli mehmonxona yashirin tarzda o‘rnatilgan avtomat elektr hisoblash tizimiga tashqi ta’sir ko‘rsatilgani ma’lum bo‘ldi.

Natijada iste’molchiga 16,9 million kilovatt soat hisobga olinmagan elektr energiyasi bo‘yicha 7,6 milliard so‘m miqdorida qayta hisob-kitob ishlari amalga oshirildi. Ushbu hajmdagi elektr energiyasi o‘rtacha 85 mingta xonadonning bir oylik iste’molini tashkil qiladi.  

Qoidabuzar iste’molchiga nisbatan belgilangan tartibda choralar ko‘rilib, tegishli hujjatlar huquqni muhofaza qiluvchi organlarga taqdim etildi.

O‘zA